Jueces 10:1-18
10 Guti si Abimélec, bizulú Tolá biʼniʼ juzgar* guidxi Israel. Xiiñiʼ Pua laabe, xiiñiʼ Dodó de tribu stiʼ Isacar. Gulézabe Samir, lade ca dani stiʼ Efraín.
2 Biaʼsi 23 iza biʼniʼ juzgarbe ndaaniʼ guidxi Israel. De raqué gútibe ne bicaachicabe laabe Samir.
3 Gútisibe, maʼ Jaír galaadita que biʼniʼ juzgar guidxi Israel 22 iza.
4 Gupa Jaír 30 xiiñiʼ, ne gupa ca xiiñibe 30 guidxi ne cada tobi gupa ti burru. Ne de yanna runibiáʼcabe ca guidxi riʼ casi Havot-Jaír ne nuucani lu ca layú stiʼ Galaad.
5 De raqué guti Jaír ne bicaachicabe laabe Camón.
6 Ne biguetaʼ biʼniʼ ca israelita cosa ni qué riuulaʼdxiʼ Jehová ne bizulú biʼniʼ adorarcaʼ Baal,* ca bidóʼ stiʼ Astoret,* ca dios stiʼ Aram,* ca dios stiʼ Sidón, ca dios stiʼ Moab, ca dios stiʼ ca ammonita ne ca dios stiʼ ca filisteu. Bixélecabe de Jehová ne maʼ qué ñúnicabe ni ná.
7 Ngue runi bidxiichiné Jehová ca israelita ne bisaana* laacabe lu náʼ ca filisteu ne ca ammonita.
8 Guizáʼ bininácabe ne biquiichinácabe ca israelita iza que. 18 iza biquiichinácabe guiráʼ ca israelita ni guleza gaxha de guiiguʼ Jordán, lu ca layú ni nuu Galaad, ni guca stiʼ ca amorreu.
9 Laaca gudiʼdiʼ ca ammonita guiiguʼ Jordán para chigucaalucaʼ tribu stiʼ Judá ne Benjamín ne ca ni zá de Efraín. Ngue runi nabé gucaná guidxi Israel.
10 Para biʼniʼ rogar ca israelita Jehová gacané laacaʼ. Ne nacaʼ rábicaʼ laabe: «Maʼ bichéʼnedu lii, maʼ bidxiidéchedu lii, Dios stidu, ne cayuni adorardu Baal».
11 Peru ná Jehová rabi laacabe: «¿Ñee cadi naa nga bilaʼyaʼ laatu de lu ná ca egipciu, ca amorreu, ca ammonita, ca filisteu,
12 ca sidonio, ca amalequita ne ca madianita dxi biquiichinacaʼ laatu la? Dxi biʼniʼ rogartu naa gacaniáʼ laatu la? bilaʼyaʼ laatu de lu nácabe.
13 Peru bidxiidéchetu naa ne bizulú cayuni adorartu xcaadxi dios. Nga runi maʼ qué zulaʼyaʼ laatu.
14 Laché ra nuu ca dios ni maʼ gulitu yanna; laguinabaʼ laacabe gulácabe laatu ora cayacanatu».
15 Peru ná ca israelita que rábicaʼ Jehová: «Maʼ bichéʼnedu lii. Lii guʼyuʼ xi gúniluʼ laadu. Peru rinábadu lii gulaluʼ laadu biaje riʼ».
16 De raqué bisáʼbicabe ca dios ni runi adorárcabe ne biguetaʼ biʼniʼ adorárcabe Jehová. Ne ora bíʼyabe pabiáʼ cayacaná guidxi Israel biabe laacaʼ.
17 Gudiʼdiʼ si tiempu, gucuaasaa ca ammonita ne gudíxheca campamentu sticaʼ Galaad. Ne ca israelita la? gucuaasaacaʼ ne gudíxhecaʼ campamentu sticaʼ Mizpá.
18 Para ná ca binni ne ca príncipe de Galaad que: «¿Tu sániru ládenu para chitíndenenu ca ammonita? Ni sániru ca gaca xaíque stiʼ ca binni ni nabeza Galaad».
