Jueces 12:1-15
12 De raqué gucuasaa ca hombre de Efraín. Gudíʼdicabe neza Zafón,* ne ora yendácabe ra nuu Jefté gúdxicabe laa: «¿Xiñee qué ñábiluʼ laadu ora gudíʼdiluʼ zitindeneluʼ ca ammonita pue? Zuzáʼquidu lídxiluʼ interu nuuluʼ ndaanini».
2 Para ná Jefté rabi laacabe: «Naa ne xquidxeʼ gupanedu ca ammonita ti guendanagana. Ne gunabaʼ laatu gueeda gacanetu laadu, peru qué ñeeda gacanetu laadu.
3 Cumu biiyaʼ qué ninatu ñeedatu la? qué lica ñaʼyaʼ xpidaʼ ne bireeʼ zitindeniáʼ ca ammonita, peru gucané Jehová naa guneʼ ganar laacabe. Yanna, ¿xiñee zeeda tindenetu naa pue?».
4 De raqué bicaasaa Jefté ca hombre de Galaad ne gudindené tribu stiʼ Efraín. Biʼniʼ ganar ca hombre de Galaad tribu stiʼ Efraín, nécaxa guniʼcaʼ: «Laatu, ca galaadita, neca nabézatu lu ca layú stiʼ Efraín ne Manasés peru para ca binni de Efraín la? gastiʼ nga laatu».
5 Para biseeguʼ ca binni de Galaad ca lugar* ra randa ridiʼdiʼ binni ndaaniʼ guiiguʼ Jordán ante tidiʼ ca hombre de tribu stiʼ Efraín. Ne ora gacalaʼdxiʼ ca hombre de Efraín tídicaʼ para guxooñelucaʼ, riniʼcaʼ «Bidii lugar tideʼ». Óraque rinabadiidxaʼ ca hombre de Galaad laacabe «¿Efraimita lii la?». Ne laacaʼ riniʼcaʼ «¡Coʼ!»,
6 para rábicabe laacaʼ «Bueno, guníʼ shibolet pue». Peru lugar de ngue riniʼcaʼ «Sibolet», purtiʼ qué randa riniʼcaʼ diidxaʼ riʼ jneza. Óraque rinaazecabe laacaʼ ne raqué ruuticabe laacaʼ, ra nuu ca lugar ra randa ridiʼdiʼ binni ndaaniʼ guiiguʼ Jordán. Dxi que guti cuarenta y dos mil Efraimita.
7 Biaʼsi xhoopaʼ iza biʼniʼ juzgar Jefté ndaaniʼ guidxi Israel. De raqué gútibe ne bicaachicabe laabe ndaaniʼ guidxi Galaad, xquídxibe.
8 De raqué maʼ Ibzán de guidxi Belén biʼniʼ juzgar ndaaniʼ guidxi Israel.
9 Gúpabe 30 xiiñibe hombre ne 30 xiiñibe gunaa. Bicheelabe ca xiiñidxaapabe ca hombre ni cadi naca de familia stibe ne beedanebe 30 gunaa para guichaganáʼ ca xiiñibe hombre. Biʼniʼ juzgarbe guidxi Israel gadxe iza.
10 De raqué guti Ibzán ne bicaachicabe laabe Belén.
11 Despué maʼ Elón, zabulonita que, biʼniʼ juzgar ndaaniʼ guidxi Israel. Biaʼsi chii iza biʼniʼ juzgarbe ndaaniʼ guidxi Israel.
12 De raqué guti Elón, zabulonita que, ne bicaachicabe laabe Ayalón, lu layú stiʼ Zabulón.
13 Gútisibe, maʼ Abdón, xiiñiʼ Hilel, piratonita que, biʼniʼ juzgar ndaaniʼ guidxi Israel.
14 Gúpabe 40 xiiñibe ne 30 nietu, ne cada tobi de ca xiiñibe ne ca xniétube nápacaʼ ti burru ni riguíʼbacaʼ. Biaʼsi xhono iza biʼniʼ juzgarbe ndaaniʼ guidxi Israel.
15 Despué guti Abdón, xiiñiʼ Hilel, piratonita que, ne bicaachicabe laabe Piratón, lu layú stiʼ Efraín, lu dani stiʼ ca amalequita.
