Jueces 13:1-25
13 Sti biaje ca biguetaʼ biʼniʼ ca israelita cosa ni qué riuulaʼdxiʼ Jehová. Ngue runi bidii Jehová lugar guquiichináʼ ca filisteu laacabe 40 iza.
2 Tiempu que bibani ti hombre láʼ Manóah, de Zorá laabe, de familia stiʼ ca danita. Ne qué ganda gaca xiiñiʼ xheelabe.
3 Ti dxi, bihuinni ángel stiʼ Jehová nezalú xheelaʼ Manóah ne gudxi laabe: «Neca qué huayanda gápaluʼ xiiñiluʼ, peru zacaxiiñiluʼ ne zápaluʼ ti hombrehuiiniʼ.
4 Guyuu si cuidadu cadi gueluʼ vinu nin xiixa ni napa alcohol, ne cadi goloʼ gastiʼ ni nabiidiʼ.*
5 Zacaxiiñiluʼ ne zápaluʼ ti hombrehuiiniʼ. Cadi naquiiñeʼ igá guicha íquebe* purtiʼ dede dxi gálebe zareechube para Dios,* ne laabe nga chigulabe guidxi Israel de lu náʼ ca filisteu».
6 Para biree gunaa riʼ zitidxi xheelaʼ ni bizaaca. Ne ná rabi laabe: «Beeda ti hombre stiʼ Dios ni dxandíʼ ra nuaaʼ. Guizáʼ bidxagayaaʼ ora biiyaʼ laabe, ruluiʼbe ti ángel stiʼ Dios ni dxandíʼ. Qué ninabadiidxaʼ diaʼ laabe padé zeedabe ne laaca qué ñábibe naa tu labe.
7 Peru gúdxibe naa: “Zacaxiiñiluʼ ne zápaluʼ ti hombrehuiiniʼ. Cadi gueluʼ vinu, nin xiixa ni napa alcohol ne cadi goloʼ gastiʼ ni nabiidiʼ* purtiʼ zareechú hombrehuiiniʼ riʼ para Dios* dede dxi gale hasta dxi gatiʼ”».
8 Despué, gunabaʼ Manóah Jehová: «Bitiidilaʼdxiʼ naa, Jehová, peru canabaʼ lii guseendaluʼ hombre stiluʼ que sti biaje para gusiene laadu ximodo gusiniisidu hombrehuiiniʼ chigale ca».
9 Bicaadiaga Dios ni dxandíʼ Manóah, ngue runi, laga nuu xheelabe lu layú, beeda ángel stiʼ Dios ni dxandíʼ ra nuu gunaa que sti biaje. Peru cadi raqué nuu Manóah, xheelabe.
10 Para biree guxooñeʼ gunaa riʼ zitidxi xheelaʼ ne ná rabi laabe: «¡Beeda hombre que ra nuaaʼ sti biaje!».
11 Para biasa Manóah ziné xheelaʼ ra nuu hombre que ne gunabadiidxaʼ laabe: «¿Ñee lii nga hombre guniʼné xheelaʼ la?». Para bicábibe: «Ajaʼ, naa».
12 Óraque ná Manóah rabi laabe: «¡Gaca guiráʼ ni maʼ guniʼluʼ ca! Peru gudxi laadu, ¿ximodo chiguibani hombrehuiiniʼ riʼ? ¿Ne xi chigúnibe?».
13 De raqué ná ángel stiʼ Jehová rabi Manóah: «Maʼ gudxeʼ xheelaluʼ xi cadi naquiiñeʼ guni.
14 Cadi naquiiñeʼ gobe xiixa ni napa uva, cadi naquiiñeʼ guebe vinu o xiixa ni napa alcohol ne cadi naquiiñeʼ gobe nin ti cosa ni nabiidiʼ. Caquiiñeʼ gúnibe guiráʼ ni maʼ gudxeʼ laabe».
15 Óraque ná Manóah rabi ángel stiʼ Jehová: «Cadi cheluʼ, guleza guni preparardu ti chivuhuiiniʼ para lii».
16 Para ná ángel stiʼ Jehová rabi Manóah: «Pa guiaanaʼ la? qué zahuaʼ diaʼ xquendaroloʼ. Peru pa naluʼ la? zanda gudiiluʼ ni Jehová casi ti ofrenda ni riaʼquiʼ». Ni qué ganna Manóah nga, pa ti ángel stiʼ Jehová laabe.
17 De raqué gunabadiidxaʼ Manóah ángel stiʼ Jehová: «¿Tu laluʼ? Purtiʼ rápadu gana gusisácadu lii ora gaca cumplir ca diidxaʼ guniʼluʼ».
18 Peru bicabi ángel stiʼ Jehová laabe: «Cadi guinabadiidxatu naa tu laʼyaʼ purtiʼ guizáʼ zadxagayaatu ni».
19 Para gucuaa Manóah chivuhuiiniʼ que ne biidxiʼ* ni chigudii casi ofrenda, gudixhe cani lu ti guié para gudii ni Jehová. Óraque biʼniʼ Dios xiixa ni nabé bidxagayaa Manóah ne xheelaʼ.
20 Laga cayaʼquiʼ ofrenda nuu lu altar que, biiyaʼ Manóah ne xheelaʼ ziguiʼbaʼ ángel stiʼ Jehová lade bele que, nagueendaca bizuxíbicabe layú ne gundeteʼ íquecabe.
21 Oraqueruʼ bidii Manóah cuenta ti ángel stiʼ Jehová ngue bíʼyacaʼ. Ne maʼ qué ñuuyaruʼ Manóah ángel stiʼ Jehová riʼ sti biaje.
22 Para ná Manóah rabi xheelaʼ: «Dios nga bidúʼyanu racá. ¡Zátinu!».
23 Para ná xheelabe rabi laabe: «Pa ñacalaʼdxiʼ Jehová ñuuti laanu la? qué nicaabe ofrenda ni riaʼquiʼ stinu, nin biidxiʼ bidiʼnu laabe casi ofrenda. Ne laaca qué nuluiʼbe laanu ca cosa ni bidúʼyanu ne qué ñábibe laanu guiráʼ ni gúdxibe laanu».
24 Despué, gupa gunaa riʼ ti xiiñiʼ ne gulee labe laa Sansón. Ne ra ziniisi hombrehuiiniʼ riʼ, guluu Jehová ndaayaʼ laa.
25 Gudiʼdiʼ si ti tiempu bidii Jehová espíritu stiʼ laabe para tíndebe dxi nuube Mahané-Dan, ni nuu entre Zorá ne Estaol.
Nota
^ O «gutiidicabe navaja íquebe».
^ O «zácabe nazareu».
^ O «zaca hombrehuiiniʼ riʼ nazareu».
^ O «semiá».
