Jueces 17:1-13
-
Ca bidóʼ stiʼ Miqueas ne sacerdote gupa (1-13)
17 Lade ca dani stiʼ Efraín bibani ti hombre láʼ Miqueas.
2 Ti dxi gúdxibe jñaabe: «¿Ñee rietenaláʼdxiluʼ dxi gunábaluʼ guni castigar Dios ni gulaʼnaʼ ti mil ti gayuaa moneda de plata stiluʼ la? Naa gucuaa cani». Ora binadiaga jñaabe laabe, guníʼ: «Uguu Jehová ndaayaʼ xiiñeʼ».
3 Para bidxiguétabe jñaabe ti mil ti gayuaa moneda de plata que. Óraque ná jñaabe rabi laabe: «Zudieeʼ plata stinneʼ Jehová. Racalaʼdxeʼ iquiiñeluʼ ni para gúniluʼ ti bidóʼ ne ti estatua de guiibaʼ.* Nga runi zaa biaanané plata ca».
4 Bidxiguétasibe plata que jñaabe, guleechú jñaabe chupa gayuaa moneda de plata ne bidii ni ti plateru. Para biʼniʼ plateru que ti bidóʼ ne ti estatua de guiibaʼ* ne yeguzuhuaacabe cani ra lidxi Miqueas.
5 Napa Miqueas ti lugar ra runi adorar ca bidóʼ stiʼ. Bíʼnibe ti efod* ne xcaadxi bidóʼ* ne gulibe tobi de ca xiiñibe para gaca sacerdote stibe.
6 Ca dxi que gastiʼ nin ti rey ndaaniʼ guidxi Israel. Nga runi cada binni runi ni rabi jma jneza para laa.
7 Ca dxi que guyuu ti joven de Belén de Judá, de familia stiʼ Judá.* Levita laabe, ne maʼ napa tiempu nabézabe raqué.
8 Bireebe de ndaaniʼ guidxi Belén de Judá para guyúbibe ti lugar ra cuézabe. Neza canazabe que, yeguireebe lade ca dani stiʼ Efraín ne yendabe ra lidxi Miqueas.
9 Para gunabadiidxaʼ Miqueas laabe: «¿Padé lii?». Para bicábibe: «Levita naa ne zendaʼ de Belén de Judá, canayubeʼ ti lugar ra cuezaʼ».
10 Para gudxi Miqueas laabe: «Biaana raríʼ para gudiiluʼ conseju naa* ne gácaluʼ sacerdote stinneʼ. Ne zudieeʼ ni goloʼ ne cada iza zudieeʼ lii chii moneda de plata ne ti muda lari». Para biaana levita que ra lídxibe.
11 Zaqué nga guná joven levita que biaana ra lidxi Miqueas, ne beeda gácabe casi tobi de ca xiiñiʼ Miqueas.
12 Laaca gulí Miqueas levita que para gaca sacerdote stibe ne biaana levita que ra lídxibe.
13 Para ná Miqueas: «Yanna huaxa maʼ nannaʼ zaguu Jehová ndaayaʼ naa, purtiʼ naca levita riʼ sacerdote stinneʼ».
Nota
^ O «guiibaʼ ni guca fundir».
^ O «guiibaʼ ni guca fundir».
^ O «dios ni rápacabe ra lídxicabe». Lit. «terafim».
^ Zándaca cadi de familia stiʼ Judá laabe, nabézasibe raqué.
^ O «gácaluʼ casi bixhozeʼ».
