Jueces 19:1-30
-
Gulaxoo ca benjaminita ti gunaa ndaaniʼ guidxi Guibeá (1-30)
19 Tiempu que, dxi gastiʼ nin ti rey ndaaniʼ guidxi Israel, guyuu ti levita ni guleza ti lugar zitu, lade ca dani stiʼ Efraín. Biyúbibe ti xheelabe* de Belén de Judá.
2 Peru gupa xheelabe jnadxii. Bisaana laabe ne zeʼ Belén de Judá, ra lidxi bixhoze ne biaana raqué tapa beeu.
3 De raqué biree levita que zicaa laabe para guibiguetanebe laa (ziné mozo stiʼ ne chupa burru). Ora yendabe, bidxagalú gunaa que laabe ne guluu laabe ra lidxi bixhoze, ne ora biʼyaʼ bixhoze gunaa riʼ xpigudxi, guizáʼ biecheʼ.
4 Ngue runi gunabaʼ laabe guiaanabe raqué chonna gubidxa, para gudócabe ne güéʼcabe ne raqué gusi levita que.
5 Ra bizaa guidapa gubidxa que, biásacabe nacanda para chécabe, para ná bixhoze gunaa que rabi xpigudxi: «Gudó xiixa para gapa ladxidoʼloʼ* ne óraca maʼ zanda chetu».
6 De raqué gurícabe gudócabe ne güéʼcabe. Despué gudxi bixhoze gunaa que xpigudxi: «¿Xiñee qué guiaanatu raríʼ gueelaʼ riʼ ne guiziiláʼdxitu?».
7 Peru ora biasa levita que para cheʼ, gunabaʼ suégrube laabe sti biaje guiaanabe raqué, ne biaanabe raqué gueelaʼ que.
8 Ra bizaa gaayuʼ gubidxa que biásacabe nacanda para chécabe. Para ná bixhoze gunaa que rabi laabe: «Gudó xiixa para gapa ladxidoʼloʼ».* Ngue runi gudócabe, ne raqué nuucabe gunda huadxí.
9 Ora biasa levita que para chiné xheelaʼ ne mozo stiʼ, ná suégrube rabi laabe: «Maʼ huaxhinni ndiʼ. ¿Xiñee qué guiaanatu raríʼ gueelaʼ riʼ? Maʼ biluxe dxi riʼ. Biaana raríʼ gueelaʼ riʼ ne biziilaʼdxiʼ. Guixíʼ ndaʼ maʼ guiásatu tempranu ne chibiʼtu ra lídxitu».
10 Peru maʼ qué niná hombre que ñaana gueelaʼ que raqué. Ngue runi biree zeʼ Jebús, laca laani nga Jerusalén. Zinebe xheelabe, mozo stibe ne guiropaʼ burru stibe.
11 Maʼ zicahui ora yendácabe gaxha de Jebús. Ngue runi gunabadiidxaʼ mozo que levita que: «¿Xiñee qué guiaananu xquidxi ca Jebuseu gueelaʼ riʼ?».
12 Para ná xpixuaanabe rabi laabe: «Qué zanda diʼ guiaananu xquidxi binni, cadi israelita laacabe. Caquiiñeʼ chindanu Guibeá».
13 Para gudxi hombre que mozo stiʼ: «Chuu, pa ganda chindanu Guibeá o Ramá. Ne maʼ guidúʼyanu paraa zanda guiaananu gueelaʼ riʼ».
14 Ngue runi bireecabe zécabe, ne mayaca guiaaziʼ gubidxa ora yendácabe gaxha de Guibeá, ti guidxi stiʼ tribu stiʼ Benjamín.
15 Ne guyuucabe Guibeá para guiaanacabe gueelaʼ que raqué. Yetícabe ra luguiaa stiʼ guidxi que peru guirutiʼ qué niná nidxaagalú laacabe ra lidxi.
16 Últimu la? beeda guiree ti binnigola ni zeeda de yeguni dxiiñaʼ lu layú. De lade ca dani stiʼ Efraín laabe peru ca dxi que nabézabe Guibeá. Ca hombre de ndaaniʼ guidxi que la? benjaminita laacaʼ.
17 Ora gundisalú binnigola que, biiyabe levita que zuba ra luguiaa stiʼ guidxi que, para gunabadiidxabe laa: «¿Pa neza? ¿Paraa guyeluʼ?».
18 Óraque bicabi hombre que laabe: «Ziúpadu de Belén de Judá ne chuudu ti lugar zitu, lade ca dani stiʼ Efraín, racá napaʼ lidxeʼ. Guyaaʼ Belén de Judá ne yanna maʼ chiguibiguetaʼ ra lidxi Jehová,* peru guirutiʼ tu cayabi laadu pa ziaanadu ra lidxi.
19 Nedu guixi para gó ca burru stidu, laaca nedu pan ne vinu para naa ne xheelaʼ ne para mozo stinneʼ. Nedu guiráʼ ni iquíʼñedu».
20 Óraque ná binnigola que rabi laabe: «¡Biaana ra lidxeʼ!* Naa xcuentaʼ guiráʼ ni iquiiñeluʼ. Peru cadi guiaanaluʼ raríʼ».
21 Para yenebe hombre que ra lídxibe ne bidiibe ni gó* ca burru stiʼ. Gudiibicabe ñeecabe ne gudócabe ne güéʼcabe.
22 Laga zúbacabe cayócabe, bidxiña caadxi hombre qué iquiiñeʼ guidubi vuelta ra lidxi binnigola que. Ne bizulucaʼ caguucaʼ golpe puertaʼ que, ne nacaʼ rábicaʼ binnigola que: «¡Gulee hombre ni nuu ndaaniʼ lídxiluʼ ca para gapanedu laa relación sexual!».
23 Para biree binnigola que rabi laacabe: «Coʼ, bicheʼ caʼ, cadi gúnitu guendaquéiquiiñeʼ ca. Cayaana si hombre riʼ ra lidxeʼ. Cadi gúnitu guendahuati ca.
24 Raríʼ nuu xiiñeʼ, binnidxaaparuʼ laabe, ne laaca nuu xheelaʼ hombre riʼ. Zanda cueeʼ laacabe para gúnitu laacabe ni racaláʼdxitu ca.* Peru cadi gúnitu hombre riʼ guendaquéiquiiñeʼ ca».
25 Peru qué nulabi ca hombre que laabe. Para gulee levita que xheelaʼ ne bidiibe laa ca hombre que. Guidubi gueelaʼ gulaxoo ca hombre que gunaa que, dede nacanda. Ne bindaacabe laabe dede ora bizulú biree gubidxa.
26 Siadóʼ que, yendá gunaa que ra lidxi binnigola ra cayaana xheelaʼ, ne ora yendabe ra puertaʼ que, biábabe ne raqué biaanabe dede ora biree gubidxa.
27 Ora biasa xheelaʼ gunaa que siadóʼ ne bixheleʼ puertaʼ para cheʼ, biiyabe xheelabe nexheʼ layú que ne naguixhe náʼ ra puertaʼ yoo que.
28 Para ná hombre que rabi laabe: «Biasa, chuu». Peru maʼ qué nicábibe laa. Óraque gundisaʼ hombre que laabe, bidxiibaʼ* laabe lu burru stiʼ ne zibiʼné laabe.
29 Ora yendá levita que ra lidxi, gucuaa ti gudxíu* ne bigá cuerpu stiʼ xheelaʼ 12 ndaa. Ne biseendabe ti ndaa ra nuu cada tribu stiʼ Israel.
30 Guiráʼ ca ni biʼyaʼ ni, guniʼcaʼ: «Qué huayuu dxi guizaaca ndiʼ dede dxi biree ca israelita de Egipto. Laguuyaʼ xi caquiiñeʼ gaca, lagüíʼ* diidxaʼ ne lagabi laadu xi gúnidu».
Nota
^ O «gápaluʼ stipa».
^ O «gápaluʼ stipa».
^ O zándaca «runeʼ dxiiñaʼ ra lidxi Jehová».
^ Lit. «¡Gupa paz!».
^ O «biguuchabe gadxé gadxé clase guixi para gó».
^ O «para guilaxooto laacabe».
^ O «biquiibaʼ».
^ O «gudxíu ni ruutinécabe maniʼ».
^ O «laguiníʼ».
