Jueces 3:1-31
3 Bidii Jehová lugar guiaana caadxi guidxi lade ca israelita ni qué ñé dxi gudindenécabe ca guidxi stiʼ Canaán, para gúʼyabe pa zuzuubacaʼ diidxaʼ
2 (zacá zaziidiʼ ca generación nacubi que checaʼ lu guerra purtiʼ laacaʼ qué huayecaʼ lu guerra).
3 Ca ni biaana ládecabe nga: gaayuʼ rey stiʼ ca filisteu ne guiráʼ ca cananeu, ca sidonio ne ca heveu ni nabeza lu dani Líbano, dede lu dani Baal-Hermón hasta ra nuu entrada stiʼ Hamat.*
4 Ne biaanacabe raqué para quíxhecabe prueba ca israelita ti guihuinni pa cayúnicaʼ ni ná ca mandamientu stiʼ Jehová, ni bisiidiʼ ca bixhozebiidacaʼ* laacaʼ, casi biʼniʼ mandar Moisés.
5 Ngue runi guleza ca israelita que lade ca cananeu, ca hitita, ca amorreu, ca perizita, ca heveu ne ca jebuseu.
6 Bichaganácabe ca gunaa de ca guidxi riʼ ne bidiicabe lugar guichaganáʼ ca xiiñidxaapacabe ca hombre de ca guidxi riʼ, ne laaca biʼniʼ adorárcabe ca dios sticaʼ.
7 Bizulú biʼniʼ ca israelita que cosa ni qué riuulaʼdxiʼ Jehová; bisiaandacabe Jehová, Dios stícabe, ne biʼniʼ adorárcabe Baal* ne ca poste ni runi adorar binni.*
8 Ngue runi bidxiichiné Jehová guidxi Israel ne bisaana* laacabe lu náʼ rey stiʼ Mesopotamia,* Cusán-Risataim. Xhono iza biʼniʼ ca israelita que dxiiñaʼ para rey Cusán-Risataim.
9 Ora gunabaʼ ca israelita Jehová gacané laacaʼ, biseendaʼ Jehová ti hombre para gulá laacabe, laabe nga Otniel xiiñiʼ Quenaz, biʼchiʼ Caleb ni jma nahuiiniʼ.
10 Bidii Jehová espíritu stiʼ Otniel, ne beeda gácabe juez stiʼ guidxi Israel. Ora yetindené Otniel Cusán-Risataim, rey stiʼ Mesopotamia,* biʼniʼ ganarbe laa purtiʼ bisaana Jehová rey riʼ lu nabe.
11 Despué de ngue, 40 iza guyuu paz lu ca layú que. De raqué guti Otniel, xiiñiʼ Quenáz.
12 Ne sti biaje ca bizulú ca israelita bíʼnicaʼ cosa ni qué riuulaʼdxiʼ Jehová. Ngue runi bidii Jehová lugar gaca Eglón, rey stiʼ Moab, jma nadipaʼ que ca israelita purtiʼ cayúnicabe cosa ni qué riuulaʼdxiʼ Jehová.
13 Laaca bidiibe lugar gucaalú ca ammonita ne ca amalequita guidxi Israel, ne laacaʼ nga biʼniʼ ganarcaʼ guidxi ni runibiáʼcabe casi guidxi ziña.
14 Biaʼsi 18 iza biʼniʼ ca israelita dxiiñaʼ para Eglón, rey stiʼ Moab.
15 Despué gunabaʼ ca israelita Jehová gacané laacaʼ, para biseendaʼ Jehová ti hombre chigulá laacabe. Laabe nga Ehúd xiiñiʼ Guerá, ti benjaminita ne bigaʼ* hombre riʼ. Gudiʼdiʼ si ti tiempu, biseendaʼ ca israelita Ehúd chitixe impuestu Eglón, rey stiʼ Moab.
16 Para biʼniʼ Ehúd ti espada ni naduxhuʼ guiropaʼ ladu ne ziuulani biaʼ ti codo* ne bindiibibe ni lu xcoʼrebe ladu derechu, xaʼnaʼ xhábabe.
17 Yendabe raqué ne gudíxebe impuestu Eglón, rey stiʼ Moab, guizáʼ gordo rey riʼ.
18 Bidii si Ehúd ca cosa ni ziné que, biseendabe ca binni yené laabe que chibiʼcaʼ.
19 Ne ora yendácabe Guilgal, ra nuu caadxi bidóʼ de guié, biguetaʼ Ehúd ra nuu rey que ne gúdxibe laa: «Rey stinneʼ, napaʼ ti mensaje para lii si». Óraque guníʼ rey que: «¡Laigani!». Para biree guiráʼ ca ni runi xhiiñaʼ rey que.
20 Laga zuba rey que ndaaniʼ ti cuartu ra rinaazeʼ bi ique yoo que, bidxiñaʼ Ehúd ra nuube ne ná rabi laabe: «Ndiʼ nga ni cuseendatidxi Dios lii». Ora binadiaga rey que laabe, biasa de lu trono stiʼ.*
21 Para gulee Ehúd espada liibi lu xcoʼre que né náʼ ladu bigaʼ* ne bidxigaʼ ni ndaaniʼ Eglón.
22 Guidubi naca espada que biaaziʼ ndaanibe dede né xcáchani. Ne biaana espada que ndaanibe purtiʼ maʼ qué nibee Ehúd ni, dede bilate xquiʼ rey que.
23 Para biseeguʼ Ehúd ca puertaʼ stiʼ cuartu que né llave ne biree neza ra ventana.
24 Zeʼ si Ehúd, biguetaʼ ca ni runi xhiiñaʼ rey que ne biiyacaʼ deʼguʼ ca puertaʼ stiʼ cuartu que né llave. Para nacaʼ: «Zándaca nuube bañu ndaaniʼ cuartu ca».
25 Peru cumu maʼ xadxí de cabézacabe ne cadi caree ga rey que ndaaniʼ cuartu que la? gucuaacabe llave ne bixhélecabe. Ne ora biuucabe, biiyacabe ¡nexheʼ rey que layú, maʼ guti!
26 Laga nuucabe raqué, bixooñeʼ Ehúd, gudíʼdibe ra nuu ca bidóʼ de guié que ne yendabe Seirá, sin ñácabe gastiʼ.
27 Ne ora yendabe lade ca dani stiʼ Efraín, bixhídxibe cachu. Para bietenebe ca israelita lade ca dani que ne zánirube lucaʼ.
28 Ne gúdxibe laacaʼ: «Latananda naa, purtiʼ maʼ bisaana Jehová ca moabita, ca enemigu stitu, lu natu». Ne yenanda ca israelita que laabe. Ne para cadi guxooñeʼ ca moabita que la? yeguzuhuaacabe ra nuu ca lugar* ra randa ridiʼdiʼ binni ndaaniʼ guiiguʼ Jordán. Qué nudiicabe lugar nidiʼdiʼ guirutiʼ.
29 Dxi que biiticabe biaʼ chii mil moabita, puru hombre nadipaʼ ne nadxibalú. Nin tobi qué ñanda nuxooñelú.
30 Zaqué nga beeda gaca ca moabita esclavu stiʼ guidxi Israel. Ne 80 iza guyuu paz lu ca layú que.
31 Guti si Ehúd, Samgar xiiñiʼ Anat biaana xlugarbe. Ne biiti Samgar xhoopaʼ gayuaa filisteu né ti puya para yuze ne laaca bilabe guidxi Israel.
Nota
^ O «Lebó-Hamat».
^ O «ca familia sticaʼ ni bibani dxiqué».
^ Lit. «bitoo».
^ Lit. «Aram-Naharaim».
^ Lit. «Aram».
^ O «zurdo».
^ Zándaca ti codo nachucu, biaʼ 38 cm. Biiyaʼ apén. B14.
^ O «banguʼ stiʼ».
^ O «izquierdo».
^ O «ca vadu».
