Lucas 13:1-35

XHÍDXINI LU

Pa qué gaca arrepentir binni zanitilú (1-5)
Ejemplu stiʼ yaga duʼgaʼ ni qué rudii cuananaxhi (6-9)
Bianda ti gunaa natigu deche sábadu (10-17)
Ejemplu stiʼ biidxiʼ mostaza ne levadura (18-21)
Caquiiñeʼ guni binni stale stipa para guiuu ra puertaʼ nabéʼ (22-30)
Herodes, «mañoso» que (31-33)
Biinaʼ Jesús pur Jerusalén (34, 35)

13 Ca dxi que gudxi chupa chonna binni nuu raqué Jesús biiti Pilato caadxi binni de Galilea ni cudii sacrificiu. ² Óraque bicábibe laacaʼ: «¿Ñee rábitu bizaaca ca binni de Galilea ndiʼ purtiʼ jma nápacaʼ pecadu que xcaadxi binni xquídxicaʼ la? ³ Coʼ. Nga runi cayabeʼ laatu, pa qué gaca arrepentirtu la? laaca zanitilú guiratu. ⁴ O ca 18 binni gutiʼ ora biaba torre de Siloam luguiacaʼ, ¿ñee rábitu jma nápacabe pecadu que guiráʼ binni nabeza Jerusalén la? ⁵ Coʼ. Nga runi cayabeʼ laatu, pa qué gaca arrepentirtu la? laaca zanitilú guiratu, cásica binitilúcabe». ⁶ Óraque gudíxhebe ti ejemplu:* «Guyuu ti hombre napa ti yaga duʼgaʼ* lu layú uva stiʼ, ne yeyubi cuananaxhi luni, peru gastiʼ qué nidxela. ⁷ De raqué gúdxibe hombre runi dxiiñaʼ lu layú que: “Maʼ né ndiʼ chonna iza de redayubeʼ cuananaxhi lu yaga duʼgaʼ riʼ, ne gastiʼ qué ridxelaʼ. ¡Bisaba ni! ¿Xi para caroobaʼ ni lu layú riʼ pa cadi cudii ni cuananaxhi?”. ⁸ Para ná hombre que rabi laabe: “Señor, bisaana ni sti iza si, chindaaʼ ñee ni ne chiuchayaʼ ni abono. ⁹ Pa gudii ni cuananaxhi despué la? zaa zuhuaa ni; peru pa coʼ la? bisaba ni”». ¹⁰ Ti dxi cusiidiʼ Jesús ndaaniʼ tobi de ca sinagoga* dxi sábadu.* ¹¹ Ne raqué nuu ti gunaa ni maʼ ziné 18 iza de huará pur ti demonio,* ne natigu* deche ne qué randa ruzuhuaa derechu. ¹² Ora biʼyaʼ Jesús laabe, guyé ra nuube, ne ná: «Gunaa, maʼ bianda guendahuará stiluʼ». ¹³ Ne gudixhenáʼ luguiabe ne oraqueca bizuhuaabe derechu ne bisisácabe Dios. ¹⁴ Peru bidxiichi presidente stiʼ sinagoga que pur bisianda Jesús dxi sábadu, ngue runi gúdxibe ca binni que: «Nuu xhoopaʼ gubidxa para gaca dxiiñaʼ, nga runi latáʼ ca dxi ca para guiándatu, peru cadi gueedatu sábadu». ¹⁵ Peru bicabi Señor laabe: «Aque hipócrita laatu, ¿ñee qué ruxhéguetu toro o burru stitu ra cayó para chiugueʼtu nisa laame sábadu la? ¹⁶ Yanna, gunaa riʼ, xiiñiʼ Abrahán laa, ne maʼ raca 18 iza de nundiibi Binidxabaʼ laa, ¿ñee cadi jneza guiándabe de guendahuará stibe neca sábadu la?». ¹⁷ Ora guniʼbe ca diidxaʼ riʼ, bituí lú guiráʼ ca ni cucaalú laabe, peru biecheʼ guiráʼ ca binni nuu raqué pur guiráʼ ca cosa sicarú ni bíʼnibe. ¹⁸ Ne laaca gúdxibe laacaʼ: «¿Casi xii nga zeeda gaca Reinu stiʼ Dios,* ne xi zanda guchaagaʼ ni yaʼ? ¹⁹ Zeeda gaca ni casi ti biidxiʼ mostaza ni gucuaa ti hombre ne bidxiibaʼ ndaaniʼ leʼ* stiʼ. Peru ora maʼ gundani ni reeda gaca ni ti yaga naroʼbaʼ, ne biʼniʼ ca pájaru ni ripapa lídxicaʼ lu ca rama stini». ²⁰ Ne guníʼ Jesús sti biaje: «¿Xi zanda guchaagaʼ Reinu stiʼ Dios?* ²¹ Zeeda gaca ni casi levadura ni gucuaa ti gunaa ne biguuchaʼ chonna medida roʼ* de harina. Guca si ngue la? guca fermentar guidubi naca cuba que». ²² Ne laga zeʼ Jesús Jerusalén, biuu ndaaniʼ guiráʼ ca guidxi ne ndaaniʼ ca guidxihuiiniʼ, canagusiidiʼ binni. ²³ Óraque gunabadiidxaʼ ti hombre laabe: «Señor, ¿ñee chupa chonna si nga zalá la?». Para rábibe laacaʼ: ²⁴ «Laguni stale stipa pur guiuutu ra puertaʼ nabéʼ, purtiʼ cayabeʼ laatu stale tu zacalaʼdxiʼ guiuu, peru qué zanda chuʼ. ²⁵ Ora guiasa xpixuaanaʼ yoo ne uguu llave ra puertaʼ, ziaanatu fuera ne zuxhidxinatu ra puertaʼ que ne zaniʼtu: “¡Señor, bixheleʼ guiuʼdu!”. Peru zacábibe laatu: “Qué gannaʼ padé laatu”. ²⁶ Óraque zaniʼtu: “Gudoʼdo ne bideʼdu nezaluluʼ, ne bisiidiluʼ ndaaniʼ ca calle principal stidu”. ²⁷ Peru zábibe laatu: “Qué gannaʼ padé laatu. ¡Laguixeleʼ de naa, guiratu, binni ni qué runi ni jneza!”. ²⁸ Racá nga gúʼnatu ne guquiichiʼ láyatu,* ora gúʼyatu Abrahán, Isaac, Jacob ne guiráʼ ca profeta lu Reinu stiʼ Dios,* peru laatu la? ziaanatu fuera. ²⁹ Ne laaca zeeda binni de neza este ne de oeste, de ladu guiaʼ ne de ladu gueteʼ, ne zabicaʼ* ruaa mexaʼ lu Reinu stiʼ Dios.* ³⁰ Lagucaadiaga ndiʼ: nuu de ca ni naca últimu zácacaʼ primé, ne ca ni nuu primé zácacaʼ últimu». ³¹ Ne hora queca bidxiña chupa chonna de ca fariseu laabe ne nacaʼ: «Guyé, biree de raríʼ, purtiʼ nuu Herodes guuti lii». ³² Para nabe rábibe laacaʼ: «Laché ne lagabi mañoso* ca: “Biiyaʼ, cabeeʼ demonio ne cusiandaʼ binni yannadxí ne laaca zuneʼ ni guixíʼ, ne zaluxeʼ lu guionna gubidxa”. ³³ Peru naquiiñeʼ sayaʼ yannadxí, guixíʼ ne huidxe para chindayaʼ Jerusalén, purtiʼ qué zanda guuticabe ti profeta ndaaniʼ sti guidxi pa cadi ndaaniʼ guidxi Jerusalén. ³⁴ Jerusalén, Jerusalén, ni ruuti ca profeta ne ruchá guié ca ni ruseendaʼ Dios ra nuu..., ¡panda biaje gucalaʼdxeʼ ñuneʼ reunir ca xiiñiluʼ cásica riguu bere ca xiiñiʼ xaʼnaʼ xhiaa! Peru qué ninatu. ³⁵ ¡Laguuyaʼ! Ziaana lídxitu stubi ne zusaanacabe laatu. Gábecaʼ laatu maʼ qué zuuyarutu naa dede dxi guiniʼtu: “¡Lagusisaca ni zeeda lu lá* Jehová!”».*