Rut 3:1-18
3 Yanna, sicaríʼ gudxi Noemí Rut: «Xiiñeʼ, napa xidé guyubeʼ ra cuézaluʼ* para guibániluʼ galán.
2 Boaz la? pariente stinu laa, ne ca gunaa bíʼnineluʼ dxiiñaʼ que la? sierva si stibe laacaʼ. Biaa, gueelaʼ riʼ zichíbibe cebada lugar ra riguíbicabe biidxiʼ.
3 Nga runi, guze ne guluu aceite rindáʼ naxhi ládiluʼ. Gucu lari* ni jma galán nápaluʼ ne guyé ra riguíbicabe biidxiʼ. Ne biiyaʼ cadi gudiibe cuenta nuuluʼ raqué dede ora maʼ biluxe gudobe ne güeʼbeʼ.
4 Ne ora maʼ zigásibe, biiyaʼ paraa gátabe. Despué, bidxiña, guxha lari renda ñeebe ne guʼtaʼ xañeebe. Maʼ laabe gábibe lii xi gúniluʼ».
5 Para bicabi Rut: «Zuneʼ guiráʼ ni gúdxiluʼ naa ca».
6 Ne guyebe ra riguíbicabe biidxiʼ ne bíʼnibe guiráʼ ni gudxi suégrabe laabe.
7 Raqué nuu Boaz, maʼ gudó ne maʼ güeʼ ne nuu nayecheʼ.* Ne yegataʼ ñee ti montón biidxiʼ nuu raqué. Gupa si ratu, chaahuidugá bidxiña Rut ra nuube, gulee lari renda ñeebe ne guʼtaʼ raqué.
8 Ora gunda galaa gueelaʼ bibani Boaz cayacaditi, ngue runi guribe. Málasi biiyabe nexheʼ ti gunaa xañeebe.
9 Ne gunabadiidxabe laa: «¿Tu lii?». Para bicabi gunaa que: «Naa ndiʼ, Rut, sierva stiluʼ. Bichiaa lari ni náculuʼ* luguiáʼ sierva stiluʼ,* purtiʼ lii nga tobi ni zanda siʼ naa».*
10 Para gudxi Boaz laabe: «Jehová cuʼ ndaayaʼ lii, xiiñeʼ. Jma naroʼbaʼ ne nadipaʼ guendarannaxhii ni cusihuínniluʼ yanna que ni bisihuínniluʼ primé biaje que, purtiʼ qué nuyúbiluʼ ti hombre jma nahuiiniʼ, ricu o pobre.
11 Ne yanna, cadi guidxíbiluʼ, xiiñeʼ. Zuneʼ guiráʼ ni naluʼ ca, purtiʼ guiráʼ binni ni nuu ndaaniʼ guidxi riʼ nanna nácaluʼ ti gunaa nuu xpiaaniʼ.
12 Dxandíʼ, neca nacaʼ tobi ni zanda siʼ lii,* peru nuu sti pariente jma gaxha que naa ne laa zanda siʼ lii.
13 Biaana raríʼ gueelaʼ riʼ. Pa guixíʼ siadóʼ guiniʼbe zaziʼbe lii la? zaa gúnibe ni. Peru cayuneʼ jurar lii casi peʼ nuu Jehová, pa qué nabe sibe lii la? naa guneʼ ni. Yanna, guʼtaʼ raríʼ dede ora guirá gueelaʼ».
14 Ngue runi gúʼtabe xañee Boaz dede ra birá gueelaʼ ne biásabe ante guiaaniʼ para cadi gunibiáʼcabe laabe. Despué guníʼ Boaz: «Cadi ganna binni beeda ti gunaa ra riguíbinu biidxiʼ».
15 Ne guníʼrube: «Dané lari ni réndaluʼ ca, bixheleʼ ni ne gunaazeʼ ni». Laga naazebe ni, bichá Boaz xhoopaʼ medida* de cebada ndaaniʼ ni. Despué gundísabe ni, bidiibe ni Rut ne zebe* ndaaniʼ guidxi.
16 Biguetaʼ si Rut ra lidxi suegra, gunabadiidxaʼ Noemí laa: «¿Xi fin gúpaluʼ,* xiiñeʼ?». Para gudxi Rut laabe ximodo gucané Boaz laa,
17 ne guníʼ: «Bidiibe naa xhoopaʼ medida de cebada riʼ ne gúdxibe naa “Yené ndiʼ ti cadi cheluʼ ra lidxi suégraluʼ xieenaluʼ”».
18 Óraque gudxi Noemí laabe: «Yanna la? xiiñeʼ, guleza, guidúʼyanu xi guizaaca purtiʼ yannadxí ca zúnibe guiráʼ ni nuu lu nabe para guni chaahuibe ni».
Nota
^ Lit. «ti lugar ra guiziiláʼdxiluʼ».
^ O «ca lari».
^ Lit. «nuu ladxidóʼ nayecheʼ».
^ O «ñee lari náculuʼ».
^ O «Bilá sierva stiluʼ».
^ O «ti recomprador».
^ Zándaca xhoopaʼ medida de sea, o biaʼ 44 litru. Biiyaʼ apéndice B14.
^ O «zeʼ Boaz».
^ Lit. «Tu lii».
