¿Pabiáʼ tiempu zineluʼ de cabézaluʼ gueeda Reinu stiʼ Dios? ¿Ñee cayuni huantarluʼ né paciencia neca cadíʼdiluʼ lu guendanagana la? (Ro 8:25). Nuu caadxi xpinni Cristu runi maltratárcabe laacaʼ, nanaláʼdxicabe laacaʼ, ruseguyoocabe ne dede huayacaláʼdxicabe guuticabe laacaʼ. Ne stale de laacaʼ runi sufrir pur xiixa guendahuará ni qué rianda o purtiʼ maʼ zigólacaʼ.

¿Xi caquiiñeʼ gúninu para guni huantarnu laga cabézanu neca guizaaca intiica cosa yaʼ? Naquiiñeʼ gúninu stipa pur gaca fe stinu naguidxi ra guidúʼndanu Biblia guiráʼ dxi ne guiníʼ íquenu de laani. Naquiiñeʼ gucáʼ íquenu esperanza nápanu (2Co 4:16-18; Heb 12:2). Ne cadi naquiiñeʼ gusaana de guni orarnu Jiobá ne guinábanu laa gudii stipa laanu pur mediu de espíritu santu stiʼ (Lu 11:10, 13; Heb 5:7). Bixhózenu ni nadxii laanu zacané laanu gápanu paciencia ne chuʼnu nayecheʼ para guni huantarnu guiráʼ ni guidxaagalunu (Col 1:11).

BIIYAʼ VIDEU NI LÁʼ NAQUIIÑEʼ GUXÓʼÑENU SIN GUIDXÁGANU: GÁPANU CONFIANZA ZUNI GANARNU PREMIU CA NE DESPUÉ BICABI CA PREGUNTA RIʼ:

• ¿Xii nga cosa ni cadi caníʼ íquenu zándaca guizaacanu? (Ec 9:11).

• ¿Ximodo racané oración laanu para gudxíʼlunu intiica guendanagana?

• Pa maʼ qué ganda gúninu xhiiñaʼ Jiobá casi ante, ¿xiñee galán chuʼnu nayecheʼ né ni zanda si gúninu?

• ¿Xi racané lii cadi gusaana de gápaluʼ confianza zuni ganarluʼ premiu ca?