Pa quíxhenu meta ndaaniʼ xquidxi Jehová zaquiiñenu tiempu ne stipa stinu jneza ante gueeda fin stiʼ guidxilayú riʼ (1Co 9:26; Ef 5:15, 16). ¿Xiñee qué gúʼyaluʼ lii ne familia stiluʼ xi meta zanda ugaandatu sti iza de serviciu ca lu adoración en familia stitu? Lu Xhiiñaʼ Dios riʼ zeeda caadxi tema ni zacané lii gánnaluʼ xi meta quíxheluʼ despué de guni orarluʼ Jehová (Snt 1:5).

Guzéʼtenu ti ejemplu. ¿Ñanda ñacanetu neca tobi de familia stitu para gaca precursor regular la? Ne pa cadxíbiluʼ qué gusaaluʼ hora stiluʼ, zanda guinabadiidxaluʼ xcaadxi precursor ni huazaaca ni cazaacaluʼ xi huayacané laacaʼ (Pr 15:22). Zanda guni entrevistarluʼ ti precursor lu adoración en familia stitu ne gúniluʼ ti horariu stiluʼ. Ne pa gúcaluʼ precursor dxiqué, ¿xiñee qué gúniluʼ stipa gácaluʼ ni sti biaje yaʼ? Zándaca yanna jma nápaluʼ tiempu.

¿Zanda gaca tuuxa de familia stitu precursor auxiliar ti beeu o jma la? Pa maʼ huaxiéʼ stipa nápaluʼ, zanda guni predicarluʼ neca ti ratu guiráʼ dxi. Ne pa huaxiéʼ tiempu nápaluʼ ndaaniʼ semana purtiʼ rieluʼ dxiiñaʼ o rieluʼ scuela la? zanda gácaluʼ precursor auxiliar ca beeu napa dxi festivu o ni né gaayuʼ fin de semana. Bicaa lu calendariu xi beeu racaláʼdxiluʼ gácaluʼ precursor auxiliar ne biʼniʼ ti horariu stiluʼ (Pr 21:5).

DESPUÉ DE GÚʼYALUʼ VIDEU NI LÁʼ LAGACA NADXIBALÚ, CA PRECURSOR, ZANDA GUICÁBILUʼ CA PREGUNTA RIʼ:

• ¿Ximodo gupa Jehová hermana Aamand? ¿Xi zanda guizíʼdinu de ni bizaacabe riʼ?