XIÑEE RISACA NI. Pa dede ante gaca preparar estudiante stinu jma fácil zaca para laabe guiénebe ne cadi guiaandaʼ laabe ni caziidibe. Zacané nga laabe guni progresarbe nagueenda. Despué de chuʼnísabe, laaca naquiiñeʼ gaca prepararbe para reunión ne para chiguni predicarbe ti ganda gatanabe en sentidu espiritual (Mt 25:13). Nga runi guiziidibe gaca prepararbe ne cadi gusaana de gúnibe ni zacané ni laabe guidubi xquendanabánibe. Dede ora guzulú gudiʼnu estudiu ti binni caquiiñeʼ gacanenu laabe gaca prepararbe dede ante ne cadi gusaana de gúnibe ni.

XIMODO GÚNILUʼ NI

• Guca ti ejemplu para laabe (Ro 2:21). Guca preparar biaʼ ra nexheʼ chiguni estudiartu ne guníʼ ique xi caquiiñeʼ estudiante stiluʼ (km 11/15 yaza 3). Biluíʼ laabe ximodo biʼniʼ subrayarluʼ publicación stiluʼ.

• Guluu gana laabe gaca prepararbe. Ora jma seguidu gudiiluʼ estudiu binni ca, bisiene laabe xiñee risaca gaca prepararbe dede ante. Bidii sugerencia ni zacané laabe para cueebe tiempu guni estudiarbe. Nuu hermanu ruluíʼ libru stiʼ ni maca biʼniʼ subrayar estudiante stiʼ, para guʼyaʼ estudiante ca jma ziene ni caziidiʼ pa dede ante gaca preparar. Biʼniʼ felicitar laabe ora gaca prepararbe.

• Bisiidiʼ laabe gaca prepararbe. Caadxi publicador rusiidiʼ estudiante stiʼ guni subrayar publicación stiʼ dede primé biaje chiganna laabe.