Nápanu tapa videu para guni ofrecernu estudiu. ¿Xi para guca cada tobi de laacani ne ximodo zanda iquiiñenu ca ni lu predicación yaʼ?

• Xiñee naquiiñeʼ gúʼndaluʼ Biblia (videu ziuulaʼ). Guca ni para gacaneni binni chuulaʼdxiʼ guiziidiʼ de lu Biblia neca gadxé ni runi cré. Rucaani binni guyubi lu Biblia respuesta stiʼ ca pregunta jma risaca ni huanabadiidxacaʼ ne ruluiʼni né ti ejemplu xiñee jneza respuesta ca. Ra maʼ ziluxe ni rusiéneni ximodo guinabaʼ binni ti estudiu.

• ¿Xiñee naquiiñeʼ gúʼndaluʼ Biblia? (videu nachucu). Laaca casi videu ziuulaʼ que ni, peru cumu jma huaxiéʼ rindaa ni la? zanda iquiiñenu ni lu ca territorio ra huaxiéʼ tiempu napa binni.

• Ximodo ridúʼndanedu binni Biblia. Guca ni para guʼyaʼ binni ximodo rudiʼnu estudiu de lu Biblia sin quixe ne ricábini pregunta casi ximodo guinábacabe ti estudiu.

• ¡Cayéchedu chiguni estudiarluʼ Biblia! Ruluinu videu riʼ binni ni maʼ cacaa estudiu. Neca zeeda videu riʼ lu yaza 2 stiʼ libru ¡Zanda guibániluʼ nayecheʼ!, peru laaca zanda guluinu ni binni pa maʼ bizulú cadúʼndanenu laa folletu ca. Videu riʼ cusiéneni xi zeeda lu libru ca ne ximodo chigúʼndanenu ni laabe.

Neca maca nexheʼ modo iquiiñeʼ ca videu riʼ la? zanda guluinu ni o guséʼndanu ni pa rábinu zanda gacané ni binni. Nga runi guidúʼyanu ca videu riʼ sti biaje para guiénenu ca ni ne zaca iquiiñenu ca ni lu predicación jma jneza.