Neca biquiiñeʼ stale stipa ne bueltu para gurí templu stiʼ Jiobá, nabé gucané ca israelita que lu dxiiñaʼ ni guca que ne stale gana (1Cr 29:2-9; 2Cr 6:7, 8). Despué la? modo gupaʼ ca israelita que templu que bisihuínnicaʼ pabiáʼ nadxiicaʼ Dios (2Re 22:3-6; 2Cr 28:24; 29:3). Yanna riʼ, laanu, ca xpinni Cristu, riquiiñenu tiempu ne stipa stinu para gucuinu, gusianu ne guni chaahuinu Yoo stiʼ Reinu ne Salón de Asamblea. Laaca cayuni adorarnu Jiobá nga ora rúninu guiráʼ dxiiñaʼ raca luni. Cadi dxandíʼ ti ndaayaʼ nga guninenu Jiobá dxiiñaʼ sicaríʼ la? (Sl 127:1; Ap 7:15).

• Naquiiñeʼ gusaananu guiráʼ cosa lugar stiʼ despué de cada reunión. Neca ra gurinu guidúʼyanu guiaana nayá ne galán.

• Naquiiñeʼ gacanenu guiá ne gaca chaahuiʼ Yoo stiʼ Reinu dxi nexheʼ gúninu ni. Ora nuu stale tu gacané jma nagueenda raca dxiiñaʼ ne jma nayecheʼ rúninu cani (lv yaza 92 párr. 18).

• Zanda gudiʼnu ni nápanu. Riecheʼ Jiobá ora rudiʼnu xiixa de guidubi ladxidoʼno, neca «chupa de gaayu huiini» ni qué risácapeʼ (Mr 12:41-44).

• Pa guidúʼyanu zanda la? chigacanenu ra cabí o cayaca chaahuiʼ xiixa lugar ra runi adorarnu Jiobá. Cadi caquiiñepeʼ gánnanu xiixa dxiiñaʼ para chigacanenu.