Maʼ cadi candaa zará paciencia stiʼ Jehová ne zunitilú guidxilayú malu riʼ. Dxi ca nga guinitilú guiráʼ religión ni qué rusiidiʼ ni dxandíʼ, zucaalú ti grupu de guidxi xquidxi Dios ne zunitilú Jehová guiráʼ binni malu lu Armagedón. Guiranu nga maʼ racaláʼdxinu guidúʼyanu guizaaca ni bizéʼtenu riʼ.

Dxandíʼ, qué gánnanu xi guiráʼ chiguizaaca lu gran tribulación. Casi padxí guzulú ni. Laaca qué gánnanu xii nga ni zucaa ca gobiernu ca gucaalucaʼ ca religión ca. ¿Pabiáʼ tiempu nga zucaalú ca guidxi ca xquidxi Dios ne ximodo zúnicabe ni yaʼ? ¿Xi zuni Jehová para gunitilú ca binni malu lu Armagedón? Qué gánnanu ni.

Peru cadi naquiiñeʼ guidxíbinu, purtiʼ Biblia rusiene laanu stale cosa ni riguixhedxí ladxidoʼno. Casi maʼ nabáninu «lu ca últimu dxi» (2Ti 3:1). Ne qué zudii Jehová lugar gunitilúcabe xquidxi neca gucaalúcabe guiráʼ religión ca (Mt 24:22). Ne nanna dxíchinu zulá Jehová xquidxi (2Pe 2:9). Ne laaca nánnanu maʼ gulí Jehová tuuxa ni runi ni jneza ne ni napa poder para gunitilú ca binni malu ne gulabe ca xpínnibe lu Armagedón (Ap 19:11, 15, 16).

Biblia ná «zieeguʼ binni de tantu cadxibi» ora guizaaca guiráʼ ndiʼ (Lu 21:26). Peru laanu qué zadxíbinu. Pa guidúʼndanu ne guietenaláʼdxinu ximodo bilá Jehová xquidxi dxiqué ne xi guiráʼ cayuni prometerbe laanu chigúnibe la? zacanécani laanu para gápanu confianza ne gúninu ni ná Lucas 21:28: «Laguzuhuaa derechu ne laguindisaʼ ique, purtiʼ maʼ zedadxiña dxi gácatu libre».