Gucané Biblia laacabe para bichaacabe

¿XIÑEE maʼ qué ñuni adorar ti gunaa de jma de 60 iza bidóʼ? ¿Xiñee bisaana ti sacerdote sintoísta dxiiñaʼ ni runi ndaaniʼ ti yuʼduʼ para gaca ti xpinni Cristu? ¿Xi gucané ti gunaa gusaana de chuʼ triste purtiʼ bisigáʼdecabe laa dxi gule? Gudiʼnu lugar güinécabe ni laanu.

«Maʼ cadi nundiibi ca bidóʼ ca naa» (ABA DANSOU)

IZA GÚLEBE: 1938

PADÉ LAABE: BENÍN

NI NAQUIIÑEʼ GÁNNALUʼ: BIʼNIʼ ADORARBE BIDÓʼ

MODO BIBANEʼ DXIQUÉ: Biniiseʼ ndaaniʼ guidxihuiiniʼ láʼ So-Tchahoué, nuuni gaxha de ti laguna ra nuu stale pantanu. Cumu gastiʼ carretera la? stale binni riquiiñeʼ barcu ne canuá para guiniibicaʼ. Rúnicabe guuzeʼ benda, rápacabe yuze, chivu, dendxuʼ, bihui ne bere ne rúnicabe lídxicabe de yaga, ziña ne nuu biaje de ladriu. Neca nabé pobre stale de ca binni riʼ gastiʼ cosa malu ndaaniʼ guidxihuiiniʼ riʼ.

Dxi nahuiineʼ biseendaʼ bixhozeʼ naa né ti bendaʼ ra ti yuʼduʼ raqué bisiidicabe laadu guni adorardu bidóʼ. Qué nindaa bizuluáʼ bineʼ adorar Dudua, zacá nga sti modo runibiáʼcabe dios Oduduwa ni runi adorárcabe ndaaniʼ guidxi yoruba. Bineʼ ti altar ne bizuluáʼ bineʼ sacrificiu, biquiiñeʼ aceite de yaga ziña, xcu stiʼ ti yaga láʼ ñames, bichuʼ, bere, paloma ne xcaadxi maniʼ. Riquiiñeʼ bueltu stinneʼ para sieʼ ca cosa nabé caru riʼ ti guneʼ ca sacrificiu stinneʼ.

XIMODO GUCANÉ BIBLIA NAA PARA BICHAAʼ: Dxi bizuluáʼ bineʼ estudiar Biblia, biziideʼ Jehová nga tobi lucha Dios ni dxandíʼ ne qué riuuláʼdxibe guni adorarnu bidóʼ (Éxodo 20:4, 5; 1 Corintios 10:14). Nagueendaca bidieeʼ cuenta xi naquiiñeʼ guneʼ. Bisaabeʼ guiráʼ ca bidóʼ ni napaʼ. Maʼ qué ñaaʼ diaʼ ra nuu ca espiritista ne laaca maʼ qué ñuneʼ ca ritu ni rúnicabe casi ni raca ora rati binni.

Gúcani nagana para naa. Bineʼ adorar bidóʼ jma de 60 iza. Ne nabé feu modo bicaalú ne biʼniʼ burla ca xhamiguaʼ, ca vecinu ne familia stinneʼ naa. Gunabaʼ Jehová gudii naa stipa para guneʼ ni riuulaʼdxiʼ. ¡Guizáʼ guluu Proverbios 18:10 gana naa! Racá ná: «Lá Jehová zeeda gaca ti torre nadipaʼ. Ra nuu ni ruxooñeʼ binni nachaʼhuiʼ para guilá».

Dxi bizuluáʼ guyaaʼ ca reunión ni runi ca testigu stiʼ Jehová nabé gucané ni naa purtiʼ biiyaʼ nabé nadxiisaacabe. Nabé bidxagayaa purtiʼ ruzuubacabe stiidxaʼ Dios ne rúnicabe ni ná Biblia. Óraque bidieeʼ cuenta naca ca testigu stiʼ Jehová religión ni dxandíʼ.

XI MAʼ GULEENDUÁʼ: Nabé huayacané ca principiu zeeda lu Biblia naa chuaaʼ tobi si né ca xiiñeʼ. Runeʼ sentir casi ora guleecabe xiixa luguiaʼyaʼ. Dxiqué runiteʼ stale bueltu para guneʼ adorar bidóʼ ni qué ñuni gastiʼ pur naa. Peru yanna runeʼ adorar Jehová, Dios ni maʼ cadi candaa zabee guiráʼ ca guendanagana ni nuu (Apocalipsis 21:3, 4). Dxiqué gucaʼ esclava stiʼ ca bidóʼ ca, peru yanna runeʼ adorar Jehová de guidubi ladxiduáʼ, nannaʼ dxicheʼ cayápabe naa ne pur nga nuaaʼ nayecheʼ.

«Dede dxi nahuiineʼ biyubeʼ Dios» (SHINJI SATO)

IZA GÚLEBE: 1951

PADÉ LAABE: JAPÓN

NI NAQUIIÑEʼ GÁNNALUʼ: GÚCABE SACERDOTE SINTOÍSTA

MODO BIBANEʼ DXIQUÉ: Guleʼ ndaaniʼ ti guidxihuiiniʼ ni lá Fukuoka. Nabé runi adorar bixhozeʼ ne jñaaʼ bidóʼ, nga runi dede dxi nahuiineʼ bicaacabe naa guneʼ adorar bidóʼ sintoísta. Ne maca dede tiempu que guníʼ iqueʼ ximodo guilaʼyaʼ ne ximodo gacaniáʼ binni ni napa guendanagana. Rietenalaʼdxeʼ ti biaje gunabadiidxaʼ maestru stidu laadu xi racaláʼdxidu gácadu dxi maʼ guiniisidu. Guiráʼ ca xcompañeruaʼ guniʼcaʼ racaláʼdxicaʼ gápacaʼ ti dxiiñaʼ o gunduuxecaʼ ti carrera. Peru ora gunieeʼ racala’dxe’ guneʼ ni ná Dios, guiracaʼ bixídxicaʼ naa.

Ora binduuxeʼ secundaria guyaaʼ ti scuela para gacaʼ maestru ni rusiidiʼ de religión. Raqué binebiaʼyaʼ ti sacerdote sintoísta ni ruundaʼ ti libru nayaaseʼ. Maca biiyaʼ xi libru nga ruundabe, nga runi ora gunabadiidxabe naa xi libru cayuundabe. Gudxeʼ laabe: «Biblia». Óraque gúdxibe naa: «Guiráʼ ni gacalaʼdxiʼ gaca sacerdote sintoísta la? caquiiñeʼ gúʼndacaʼ libru riʼ».

Nga runi nagueendaca guziéʼ ti Biblia ne gudixhe ni ti lugar ra zanda guuyaʼ ni. Peru cumu stale cosa nga ni runeʼ estudiar la? raca nagana para naa guundaʼ ni. Ra gudiʼdiʼ tiempu gucaʼ graduar ne gucaʼ sacerdote sintoísta ndaaniʼ ti yuʼduʼ. ¡Bigaandaʼ ni gudixheʼ iqueʼ que!

Peru qué nindaa bidieeʼ cuenta cadi ngue nga ni jma galán bineʼ. Biiyaʼ stale sacerdote qué rizaaláʼdxicaʼ binni. Stale de laacaʼ nin qué gápacaʼ fe. Tobi de ca sacerdote ca gudxi naa: «Pa racaláʼdxiluʼ cheni lii galán la? bisiidiʼ de filosofía, cadi gusiidiluʼ gapa binni fe».

Gulee ngue naa gana. Neca qué nusaana yuʼduʼ que, peru bizuluáʼ biiyaʼ xi rusiidiʼ xcaadxi religión. Laga jma cuyubeʼ la? jma rireeʼ gana. Ruluíʼ gastiʼ nin ti religión ni rusiidiʼ ni dxandíʼ.

XIMODO GUCANÉ BIBLIA NAA PARA BICHAAʼ: Lu iza 1988 binebiaʼyaʼ ti budista ni gudxi naa guundaʼ Biblia. Óraque nga bietenaladxeʼ ni gudxi xa sacerdote sintoísta naa dxi nahuiineʼ. Gucuaaʼ conseju que ne bizuluáʼ biindaʼ Biblia. Nabé bidxagayaaʼ guiráʼ ni riete luni. Nuu tiru guidubi gueelaʼ ruundaʼ Biblia.

Guiráʼ ni biindaʼ que bicaani naa guneʼ orar Dios casi rusiidiʼ Mateo 6:9-13. Cada chupa ora runeʼ oración riʼ dede né ora cayuneʼ dxiiñaʼ ndaaniʼ yuʼduʼ que.

Laga jma ziyuundaʼ Biblia, jma stale pregunta napaʼ. Para tiempu que maʼ bichaganaʼyaʼ ne nannaʼ rusiidiʼ ca testigu stiʼ Jehová de Biblia, purtiʼ cadi tan xadxí bidiicabe estudiu xheelaʼ. Gunieniaʼ ti gunaa Testigu ne bineʼ laa stale pregunta. Ni nabé bidxagayaaʼ nga riquiiñebe Biblia para guicábibe ca pregunta stinneʼ. Despué gúdxibe caadxi hermanu chigánnacaʼ naa ra lidxeʼ ne gudiicaʼ estudiu naa.

Ti tiempu despué bizuluáʼ guyaaʼ ca reunión ra Yoo stiʼ Reinu. Raqué nga bidieeʼ cuenta nuu caadxi Testigu ni nabé binenaʼyaʼ dxiqué. Peru neca zacá, bidxíñacabe ra nuaaʼ ne bidii nácabe naa.

Lu ca reunión que bisiideʼ racalaʼdxiʼ Dios gannaxhii hombre xheelaʼ ne gusisa familia stiʼ. Bidieeʼ cuenta jma rusisacaʼ dxiiñaʼ ni napaʼ casi sacerdote ne qué ruuyaʼ xi caquiiñeʼ xheelaʼ ne ca xiiñeʼ. Ne cadi ngasi, sínuque laaca rucaadiaʼgaʼ chaahueʼ ca binni rié ra yuʼduʼ que peru qué rucaadiaʼgaʼ xheelaʼ.

Laga jma ziziideʼ, jma runeʼ sentir nuaaʼ gaxha de Jehová. Yendá ca diidxaʼ ni zeeda lu Romanos 10:13 ndaaniʼ ladxiduáʼ, racá ná: «Guiráʼ tu guinabaʼ gacané Jehová laa ne iquiiñeʼ labe la? zalá». Dede dxi nahuiineʼ cuyubeʼ Dios ne yanna huaxa maʼ bidxelaʼ laabe.

Ma’ qué riuuladxeʼ guneʼ dxiiñaʼ ra yuʼduʼ que. Primerugá que la? riníʼ iqueʼ xi guiníʼ binni pa gusaanaʼ yuʼduʼ que, peru siempre gunieeʼ ora guidxelaʼ Dios ni dxandíʼ la? zusaanaʼ ni. Nga runi lu iza 1989 bisaanaʼ yuʼduʼ que ne gudixheʼ iqueʼ guneʼ ni ná Jehová.

Nabé nagana guca ni. Nabé biʼniʼ criticar ca xaíque stinneʼ naa ne dede bicaacabe naa guiaanaʼ. Peru ni jma guca nagana para naa nga gabeʼ ni bixhozeʼ ne jñaaʼ. Rietenalaʼdxeʼ ora maʼ ziaaʼ neza para gabeʼ laacabe maʼ bisaana yuʼduʼ que, guizáʼ cadxibeʼ dede cayacadiʼte’. Gupa xidé gulezadxiee’ stale biaje para guneʼ orar Jehová ne guinabaʼ laa gacané naa.

Ora yendayaʼ ra lidxi bixhozeʼ ne jñaaʼ la? qué ñanda ñabeʼ laacabe gastiʼ. Bineʼ orar Jehová stale, nga runi chupa chonna ora despué gudxeʼ ni bixhozeʼ. Gudxeʼ laabe bidxelaʼ Dios ni dxandíʼ ne religión ni rusiidiʼ ni dxandíʼ, laaca gudxeʼ laabe maʼ gudixheʼ iqueʼ guneʼ ni ná Dios ne maʼ bisaanaʼ yuʼduʼ que. Qué ñábibe naa gastiʼ ne guyuube triste. Dede beeda caadxi familia stinneʼ ra nuaaʼ para gábicaʼ naa cadi gusaanaʼ yuʼduʼ que. Qué racala’dxe’ gunenaʼyaʼ guirutiʼ purtiʼ ni racala’dxe’ nga guneʼ ni ná Jehová. Ra gudiʼdiʼ tiempu maʼ biʼniʼ respetar familia stinneʼ decisión ni gucuaaʼ que.

Neca maʼ bisaana yuʼduʼ que; napa xidé guchaaʼ modo riníʼ iqueʼ. Cumu xadxí gucaʼ sacerdote la? guca nagana para naa gusiaandaʼ guiráʼ ni bisiideʼ.

¿Xi gucané naa para gudxieeluáʼ guendanagana riʼ yaʼ? Bineʼ chupa cosa. Primé bitopa libru, cuadru ne stale cosa risaca ni caníʼ de sintoísmo ne bizaaqueʼ ca ni. Guiropa bineʼ stipa chuaaʼ jma gaxha de ca testigu sti Jehová ne gucaʼ xhamiguaʼ laacabe. Gucanécabe naa chaahuiʼ chaahuiʼ gusiaandaʼ guiráʼ ni bineʼ dxiqué.

XI MAʼ GULEENDUÁʼ: Dxiqué la? qué rizaaladxeʼ xi caquiiñeʼ xheelaʼ ne ca xiiñeʼ, nga runi, runi sentírcabe nuucabe stúbicabe. Peru cumu yenandaʼ conseju stiʼ Biblia ni ná guizaalaʼdxeʼ familia stinneʼ la? yanna huaxa maʼ nuudu tobi si. Nga runi ti tiempu despué, guca xheelaʼ testigu stiʼ Jehová. Yanna guidubi familia stinneʼ runi ni ná Jehová, naa ne xheelaʼ, ti xiiñeʼ ne ti baʼdudxaapaʼ stinneʼ ne xheelaʼ.

Dxi nahuiineʼ gunieeʼ racala’dxe’ guneʼ ni ná Dios ne gacaniáʼ xcaadxi ne yanna huaxa maʼ bigaandaʼ ni. Nga runi qué guidxelaʼ xi modo gudieeʼ xquixe peʼ Jehová pur guiráʼ ni maʼ biʼniʼ pur naa.

«Bidieeʼ cuenta cayaadxaʼ xiixa naa» (LYNETTE HOUGHTING)

IZA GÚLEBE: 1958

PADÉ LAABE: SUDÁFRICA

NI NAQUIIÑEʼ GÁNNALUʼ: BINEʼ SENTIR NUAAʼ STUBEʼ

MODO BIBANEʼ DXIQUÉ: Guleʼ ndaaniʼ ti guidxihuiiniʼ lá Germiston, gastiʼ peʼ cosa malu ndaaniʼ guidxihuiiniʼ riʼ. Cumu guníʼ ique bixhozeʼ ne jñaaʼ qué zanda gápacaʼ naa la? nga runi bisigáʼdecabe naa dxi napaʼ catorce dxi de guleʼ. Dede dxi nahuiineʼ guníʼ iqueʼ naca guendaxheelaʼ ni cayapa naa, bixhozeʼ ne jñaaʼ. Peru dxi gunnaʼ bisigáʼdecabe naa, nabé guyuaaʼ triste ne bineʼ sentir stubeʼ. Guníʼ iqueʼ cumu cadi familia stinneʼ laacabe la? qué zanda guiénecabe naa.

Dxi napaʼ 16 iza bizuluáʼ guyaaʼ ca bar né ca xhamiguaʼ para guyaaʼ ne gucaadiaʼgaʼ música. Ne dxi napaʼ 17 iza maʼ riguʼbaʼ gueza. Gucalaʼdxeʼ ñacaʼ casi ca gunaa ni riree lu ca anunciu ra cutoocabe gueza. Ne dxi napaʼ 19 iza, yendezaʼ Johannesburgo pur dxiiñaʼ stinneʼ. Nga runi nin qué nindaa bidxaagaʼ binni ni riníʼ diidxaʼ guidxa ni riguʼbaʼ gueza ne ni rixudxi guiráʼ fin de semana.

Laaca bineʼ stale ejerciciu. Bineʼ practicar gimnasia aeróbica, squash ne gudxiteʼ fútbol, laaca bicaaʼ ique guneʼ xhiiñaʼ jneza ne pur ngue nabé bisisácacabe naa. Galán nabaneʼ, gastiʼ cayaadxaʼ naa ne stale binni riníʼ galán cayé ni naa. Peru ni dxandíʼ la? feu modo nabaneʼ, cadi nuaaʼ nayecheʼ ne bineʼ sentir cayaadxaʼ xiixa naa.

XIMODO GUCANÉ BIBLIA NAA PARA BICHAAʼ: Dxi bizulú bisiideʼ de lu Biblia la? bieneʼ nadxii Jehová binni ne pur nga maʼ bisigáʼdebe laanu Stiidxabe, Biblia. Laaca bidieeʼ cuenta zeeda gaca Biblia casi ti carta ni maʼ bidii Dios laanu para guluíʼ laanu ximodo guibáninu (Isaías 48:17, 18). Bieneʼ pa racala’dxe’ chinandaʼ ni ná Biblia la? caquiiñeʼ guchaaʼ modo naa.

Primeca ni bineʼ la? maʼ qué nidxaagaʼ ca xhamiguaʼ ni napaʼ que. Casi ná Proverbios 13:20, «tu canazané binni nuu xpiaaniʼ la? zaca binni nuu xpiaaniʼ, peru tu ridxaaga binni huati la? qué zié ni laa jneza». Yenandaʼ conseju riʼ ne despué de bisaanaʼ ca xhamiguaʼ que la? bizuluáʼ gupaʼ xhamiguaʼ lade ca testigu stiʼ Jehová.

Ni jma guca nagana para naa nga gusaanaʼ de cubaʼ gueza. Dede birooa’ biaʼ 14 kilu ra gucala’dxi’ nusaana ni. Bininá ndiʼ naa stale, dede gudiʼdiʼ casi chii iza para gunda bieteʼ de pesu. Neca zaqué, nannaʼ naquiiñeʼ gusaanaʼ viciu que. Nga runi bineʼ orar Jehová guiráʼ dxi ne laabe bidiibe stipa naa para gusaanaʼ viciu que.

XI MAʼ GULEENDUÁʼ: Yanna maʼ nuaaʼ nazaaca. Ne nuaaʼ nayecheʼ né ca cosa si ni napaʼ. Ma’ cadi nuaaʼ xiiza gapaʼ ti dxiiñaʼ galán, gapaʼ bueltu o gusisaca binni naa. Naa ne xheelaʼ nabánidu nayecheʼ purtiʼ cayacanedu binni guiziidicaʼ ni dxandíʼ rusiidiʼ Biblia ne laaca maʼ gucaniáʼ chonna de ca ni bineniaʼ dxiiñaʼ guiziidicaʼ de Jehová. Ne ante gatiʼ ca ni bisiniisi naa, guinieniáʼ laacaʼ ziasa ca ni maʼ guti ne zabánicaʼ ndaaniʼ ti paraísu lu Guidxilayú riʼ.

Cumu ruuyaʼ Dios casi ti xhamiguaʼ la? maʼ qué runeʼ sentir nuaaʼ stubeʼ. Beeda gaca ca testigu stiʼ Jehová casi ti familia para naa. Raríʼ napaʼ bixhozeʼ, jñaaʼ, bizanaʼ ne bendaʼ (Marcos 10:29, 30).

[Imagen]

Biiyaʼ dxandíʼ peʼ nadxiisaa ca testigu stiʼ Jehová

[Imagen]

Yuʼduʼ ra bineʼ practicar religión sintoísmo