Historia 13

Abraham, xhamigu Dios

TOBI de ca guidxi ra yendeza binni despué de Nisaguié naroʼbaʼ que la? biree lani Ur. Ur beeda gaca ti guidxi nabé risaca ne stale yoo galán. Peru ca binni de raqué biʼniʼ adorarcaʼ stale dios ni cadi dxandíʼ, cásica bíʼnicabe Babel. Ca binni de Ur ne Babel qué ñúnidiʼcaʼ ni na Jiobá casi biʼniʼ Noé ne xiiñiʼ Sem.

Gudiʼdiʼ si chonna gayuaa cincuenta iza de biaba nisaguié naroʼbaʼ que la? guti Noé hombre chaʼhuiʼ que. Chupa iza despué beeda gale hombre ni ruuyuʼ lu yaza riʼ, nabé risácabe para Dios. Labe Abraham. Laabe ne binnilídxibe gulézacabe Ur.

Ti dxi Jiobá gúdxibe Abraham: Bisaana Ur ne ca xpariénteluʼ, ne guyé ti guidxi ra chiguluéʼ lii. Ñee bizuubabe stiidxaʼ Dios ne bisaanabe guiráʼ ni galán stiʼ guidxi Ur la? Ya, bizuubabe diidxaʼ. Ne cumu Abraham nabé bizuubaʼ stiidxaʼ Dios la? ngue runi beeda gacabiáʼcabe laabe casi xhamigu Dios.

Caadxi de ca binnilidxi Abraham bireené laa ora bireebe de Ur, bixhózebe Taré, sobrínube Lot ne xheelabe Sara. Gudiʼdiʼ si tuudxi dxi la? yendácabe ti lugar láʼ Harán, ne raqué guti Taré, nuucabe zítupeʼ de Ur.

Despué la? Abraham ne binnilidxi bireecabe de Harán ne yendácabe ti guidxi láʼ Canaán. Raqué Jiobá guníʼ: Ndiʼ nga layú ni chigudiéʼ ca xiiñiluʼ. Abraham biaana Canaán ne bibánibe ndaaniʼ ti yoo de lari ni zanda chinebe guiráʼ ra chebe.

Dios bizulú gucané Abraham ne zaqué beeda gápabe stálepeʼ dendxuʼ ne stuudxi maniʼ ne gayuaa binni ni gacané laabe. Peru laabe ne Sara qué gapadíʼcabe xiiñicabe.

Ora gupa Abraham 99 iza la? Jiobá guníʼ: Cudiéʼ stiidxaʼ lii de que zácaluʼ bixhoze stale guidxi roʼ. Peru ximodo gueeda gaca ndiʼ, pa Abraham ne Sara guizáʼ maʼ bióʼxhocaʼ para gápacaʼ ti xiiñicaʼ yaʼ.

Génesis 11:27-32; 12:1-7; 17:1-8, 15-17; 18:9-19.