Historia 32

Chii plaga

BIIYAʼ ca dibuju riʼ. Cada tobi de laacani culuíʼ cani ti plaga ni biseenda Jiobá Egipto. Lu primé ca la? ruuyuʼ Aarón caguibi vara stiʼ lu guiiguʼ Nilo ca. Nisa que guca ni rini, ne ca benda ni nuu ndaaniʼ ni gúticaʼ, ne óraque bizulú bindáʼ yuudxuʼ guiiguʼ que.

Despué, Jiobá gulee jma bidxiʼ ndaaniʼ guiiguʼ Nilo que. Ca bidxiʼ que guyuucaʼ ndaaniʼ horno, ndaaniʼ ca badiáʼ que, ne lu ca luunaʼ que, guiráʼ ladu. Ora guti ca bidxiʼ que la? ca egipciu que bicuí montoncaʼ laacame, ne guidubi guidxi que gundáʼ yuudxuʼ.

Ra bionna plaga que la? Aarón gudxibi vara stiʼ layú, ne yudé que guca biuxiʼ tuudxi manihuiiniʼ ni ripapa ne riguiru.

Stuudxi plaga que bininani ca egipciu que si, peru ca israelita que coʼ. Lu tapa plaga que beeda tuudxi bialazi roʼ ne guyuucaʼ ralidxi guiráʼ ca egipciu que. Gaayuʼ plaga que bininá ca maniʼ stícabe. Stale de ca vaca ne dendxuʼ ne chiva stiʼ ca egipciu que gúticaʼ.

Despué Moisés ne Aarón bilaacaʼ caadxi dé ludé lu bi, ne laacani guca cani tuudxi guiʼdxuʼ biree ladi binni ne maniʼ. Ndiʼ nga ni guca lu xhoopaʼ plaga que.

Gudiʼdiʼ si ngue la? Moisés gundisaʼ naʼ luguiáʼ, ne Jiobá biseenda rayu ne hielu. Qué huayuu dxi guiaba hielu casi ni guca que.

Lu xhono plaga que beeda ti manada gusú. Qué huayuuruʼ dxi chuʼ stálepeʼ gusú casi ngue dede dxi que. Ca gusú que gudocaʼ guiráʼ ni qué nunitilú ca bola hielu que.

Lu gaʼ plaga que la? beeda ti guelacahui. Chonna gubidxa guyuu guidxi que nacahuidóʼ, peru ralidxi ca israelita que guyuu biaaniʼ.

Guca si ca ngue la? Dios gudxi ca binni xquidxi gunéʼ rini stiʼ ti chiva o ti dendxuʼ ruaa puertaʼ sticaʼ. De raqué la? ángel stiʼ Dios gudiʼdiʼ ndaaniʼ guidxi Egipto, ne ora ruuyaʼ ángel que rini que la? qué ruutidibe guirutiʼ ndaaniʼ yoo que. Peru ora qué ruuyabe rini que la? ruutibe xiiñiʼ binni ni gule primé o xiiñiʼ ca maniʼ que. Ndiʼ nga chii plaga que.

Gudiʼdiʼ si plaga riʼ la? Faraón bidii lugar cheʼ ca israelita que, ne cumu laacabe maʼ nuucabe listu la? gueelaʼ queca bireecabe Egipto.

Éxodo, capítulo 7 hasta 12.