Jacob zeʼ Harán
Historia 18
Jacob zeʼ Harán
ÑEE nannuʼ tuu nga ca hombre ni caniʼné Jacob riʼ la? Despué de chupa chonna gubidxa de biree Jacob xquidxi la? yendá laacabe gaxha de ti bizé cayápacabe dendxuʼ stícabe. Jacob gunabadiidxaʼ: De paraa laatu.
De Harán, bicábicaʼ.
Ñee racabiaʼtu Labán la? gunabadiidxaʼ Jacob. Racabiaʼdu, nacaʼ. Biiyaʼ, raríʼ zeeda xhiiñibe Raquel ne guiráʼ dendxuʼ stiʼ. Zanda guuyuʼ Raquel ziguidxiña racá la?
Ora biiyaʼ Jacob zeeda Raquel ne ca dendxuʼ stiʼ stiube Labán la? bidxíñabe ne guleebe guié que ruaa bizé que ti ganda gueʼ ca dendxuʼ que nisa. Óraque Jacob bidiibe ti bixiduʼ Raquel ne gúdxibe laa tu laabe. Raquel biecheʼ stálepeʼ, ne óraque yebiibe ne gúdxibe bixhózebe Labán ni guca que.
Labán biecheʼ stale purtiʼ chiguiaana Jacob ralidxi. Ora gudxi Jacob laabe rapa gana guichaganáʼ xiiñibe Raquel la? Labán biecheʼ. Peru gunábabe Jacob guni dxiiñaʼ lu layú stibe gadxe iza ti guichaganabe Raquel. Jacob biʼniʼ ni, purtiʼ nadxiibe stálepeʼ Raquel. Peru nannuʼ xi guca ora bidxiña dxi guichaganácabe la?
Labán bidii laabe Lea baʼdudxaapaʼ huaniisi stiʼ ne cadi Raquel diʼ. Ora guníʼ Jacob zuni dxiiñaʼ xcadxe iza la? Labán laaca bidii laabe Raquel para guichaganabe laa. Dxiqué la? Dios bidii lugar ca hombre que gápacaʼ chupa chonna xheelacaʼ. Peru yanna la? riquiiñeʼ gápacabe tobi si casi na Biblia.
