Primé arcu iris
Historia 11
Primé arcu iris
NANNUʼ xi primé biʼniʼ Noé ne binnilidxi ora bireecaʼ ndaaniʼ arca que la? Laabe bisigáʼdebe Dios xiixa, biiyaʼ laabe cudiibe ni Dios lu dibuju cá gueteʼ ca. Para gudiibe xquíxepeʼ Dios pur bilá ca binnilídxibe de nisaguié naroʼbaʼ que la? biitibe manihuiiniʼ bisigáʼdebe laa.
Ñee raʼbuʼ guyuulaʼdxiʼ Jiobá ni guʼdeʼ riʼ la? Ya, guyuuláʼdxibe ni, pur nga bidiibe stiidxabe Noé de que maʼ qué ziuuruʼ dxi gunitilube cani nuu lu guidxilayú ne ti nisaguié naroʼbaʼ.
Qué nindaa diʼ bibidxi lu guidubi guidxilayú, biree si Noé ne ca binnilidxi ndaaniʼ arca que la? bichaa xquendanabánicaʼ. Dios guluu ndaayaʼ laacabe ne gudxi laacabe: Nápatu xidé gápatu stale xiiñitu. Ne nápatu xidé guidáletu dede chuʼ binni guidubi naca Guidxilayú.
Peru despué, ora gunadiaga binni de nisaguié roʼ que la? zándaca guidxíbicabe guiaba sti nisaguié casi ngue. Pur nga Dios bidiibe xiixa ni gusietenalaʼdxiʼ binni Ni guniʼbe, de que maʼ qué ziuuruʼ dxi gundaahuabe Guidxilayú riʼ de nisa. Nannuʼ xi bidiibe ti guietenaláʼdxicabe ni guniʼbe ca la? Ti arcu iris.
Stale tiru rihuinni arcu iris ca guibáʼ ora riree Gubidxa tiidiʼ si nisaguié, arcu iris ca zanda gápani stale color sicarú. Ñee huayuuyuʼ tobi la? Ruuyuʼ ni cá lu yaza riʼ la?
Ndiʼ nga ni guníʼ Dios: Cayabeʼ laatu de que maʼ qué ziuuruʼ dxi guniteluáʼ guiráʼ binni ne maniʼ ne ti nisaguié naroʼbaʼ. Cucaaʼ arcu iris stinneʼ lu ca za ca, ne ora guihuinni ni la? zuuyaʼ ni, ne zietenalaʼdxeʼ ni cayabeʼ laatu riʼ.
Nga runi, ora guuyuʼ ti arcu iris, xi riquiiñeʼ guietenaláʼdxiluʼ yaʼ. Ngapeʼ, ni guníʼ Dios de que maʼ qué ziuuruʼ dxi gunitilube cani nuu lu guidxilayú ne ti nisaguié naroʼbaʼ.
