Rilá ti baʼduhuiiniʼ láʼ Moisés
Historia 28
Rilá ti baʼduhuiiniʼ láʼ Moisés
BIIYAʼ baʼduhuiiniʼ ni cayuuna ne nagapi naʼ baʼdudxaapaʼ ca. Ndiʼ nga Moisés. Nannuʼ tuu nga baʼdudxaapaʼ sicarú ca la? Xiiñiʼ Faraón laabe ne nácabe princesa Egipto.
Jñaa Moisés bicaachibe baʼduhuiiniʼ riʼ dede dxi gupa chonna beeu, purtiʼ qué nádibe guuti ca Egipciu que xiiñibe. Peru laabe nánnabe de que zanda guidxélacabe Moisés, ngue runi, ndiʼ nga ni bíʼnibe para gulabe laa.
Binichaahuibe ti dxumi párapeʼ cadi chuʼ nisa ndaaniʼ ni, óraque gudíxhebe Moisés ndaaniʼ ni ne guluube ni lade ca guixi gaʼ stiʼ guiiguʼ Nilo que. Gúdxibe Míriam bizaʼnaʼ Moisés, guiaana gaxha para guuyaʼ xi gaca.
Qué nindaa diʼ yegaze xiiñiʼ Faraón ndaaniʼ guiiguʼ Nilo que. Málasi biiyabe ti dxumi lade ca guixi gaʼ que, para gúdxibe tobi de ca gunaa racané laabe: Dané dxumi ca raríʼ. Ora bixhaleʼ princesa que dxumi que la? ¡biiyabe ti baʼduhuiiniʼ guizáʼ galán! Baʼduhuiiniʼ que cayuuna ngue runi biá princesa que laabe, ne qué ninádibe ñuuticabe baʼduhuiiniʼ que.
Óraque guyuu Míriam. Zanda guʼyuʼ laabe lu dibuju riʼ, para gunabadiidxabe xiiñiʼ Faraón: Ñee zanda chicaa ti gunaa israelita gusiniisi baʼduhuiiniʼ riʼ la?
Guyé laʼ, na princesa que.
Biree ca Míriam ziguxooñeʼ zitidxi jñaa. Guyuu si jñaa Moisés la? princesa que gudxi laabe: Gucuaa baʼduhuiiniʼ riʼ ne bisiniisi laabe ne zaguixeʼ lii pur gapu laabe.
Zacá la? jñaa Moisés gupa laaca xiiñiʼ. Despué, biniisihuiiniʼ si Moisés la? yenebe laa ra nuu princesa que ne laa gucuaa laabe casi xiiñipeʼ. Ngue runi Moisés biniisi ralidxi Faraón.
