Cuchácabe guié Esteban
Historia 107
Cuchácabe guié Esteban
HOMBRE ni zuxibi racá nga Esteban. Laabe nga ti discípulo ni qué nucheené Jesús. ¡Peru biiyaʼ xi cayúnicabe laabe! Ca hombre riʼ cuchacaʼ guié laabe. Xiñee guizáʼ raca nanaláʼdxicabe Esteban dede rúnicabe ndiʼ laabe pue. Guidúʼyanu.
Dios huayacané Esteban para guni stale milagru. Ca hombre ca qué riuláʼdxidicaʼ ni rúnibe riʼ, nga runi ridindenécabe laabe purtiʼ cusiidibe ca binni que ni dxandíʼ. Peru Dios rudii laabe stale guendananna, ne laabe rusihuínnibe de que ca hombre que cadi cusiidicaʼ ni dxandíʼ. Ni rúnibe riʼ la? jma ruchiichini ca hombre que ne rinaazecabe laabe ne rábicabe caadxi binni guiníʼ mal de Esteban.
Xaíque stiʼ ca ni ruzaaquiʼ guʼxhuʼ que rinabadiidxaʼ laabe: Ñee dxandíʼ nga ni caníʼcabe ca la? Esteban ricabi laabe ne ti libana ni zeeda ndaaniʼ Biblia. Ra zilúxebe libana que la? guniʼbe de que guyuu hombre malu ni guca nanalaʼdxiʼ ca ni riguixhená stiʼ Dios dxiqué. Óraque riniʼbe: Laatu laaca nácatu casi laacabe. Biititu Jesús, Xiiñiʼ Dios ne cadi cuzuubatu diidxaʼ ca ley stibe.
¡Jmaruʼ si ridxiichi ca xaíque stiʼ ca religión que pur ni riniʼbe ca! Dede rixidxi láyacabe tantu ridxiichicabe. Peru ora rindisaʼ ique Esteban la? riníʼ: ¡Laguuyaʼ! Cayuuyaʼ Jesús zuhuaa ladu derechu stiʼ Dios guibáʼ, ca hombre que ruseegucaʼ diágacaʼ ne runinacaʼ laabe. Rixubiyúcabe laabe ne ribeecabe laabe de ndaaniʼ guidxi que.
Raqué ribeecabe xhábacabe ne rudiicabeni Saulo para gápani. Ñee ruuyuʼ Saulo lu dibuju riʼ la? Óraque caadxi de laacabe ruchá guié Esteban. Laabe ruzuxíbibe, casi rihuínnibe raríʼ, ne riníʼnebe Dios: Señor cadi udxiibaluʼ donda riʼ luguiácabe. Esteban nanna de que caadxi de ca hombre que cayúnicabe ni pur cani gudxi ca xaíque stiʼ ca religión que laacabe. Riníʼsibe ngue la? rátibe.
Ora tuuxa guni lii xiixa, ñee riuuluʼ guquíxuni laacabe la? o rinábaluʼ lu Dios guniná laacabe. Nin Esteban, nin Jesús qué ñúnicaʼ zacá. Laacabe gúcacabe nachaʼhuiʼ dede ne tu bininá laacabe. Guyúbinu modo gúninu zacaca.
