Historia 109

Pedru riganna Corneliu

LU dibuju riʼ rúʼyanu zuhuaa apóstol Pedru, ne nezadéchebe zuhuaa tuudxi xhamígube. Peru, xiñee zuxibi hombre ca nezalú Pedru pue. Naquiiñeʼ gaca ndiʼ la? Ñee nannuʼ tu laabe la?

Hombre ca nga Corneliu. Ti xaíque stiʼ ca hombre ridinde de guidxi Roma. Corneliu qué runibiáʼdibe Pedru, peru gúdxicabe laabe guni invitarbe Pedru ralídxibe. Guidúʼyanu ximodo guca ndiʼ.

Ca primé xpinni Cristu que judíu laacaʼ, peru Corneliu cadi judíu diʼ laa. Peru, nadxiibe Dios, runi orarbe laa ne rúnibe stale ni galán para ca binni que. Ti huadxí ti ángel stiʼ Dios málasi bihuinni ra nuube ne rabi laabe: Dios riulaʼdxiʼ modo lii, ne laabe zacábibe ca oración stiluʼ. Biseendayubi ti hombre láʼ Pedru. Nuube guidxi Jope, ralidxi Simón, ni nabeza gaxha de nisadóʼ.

Oraqueca runi Corneliu ni gudxi ángel que laa. Sti dxi que, nuu Pedru ique lidxi Simón. Dios biʼniʼ guiníʼ ique Pedru de que cayuuyaʼ ti lari naroʼbaʼ ni zeeda yete de guibáʼ. Ne luni nuu gadxé gadxé maniʼ. Ley stiʼ Dios que na de que ca maniʼ riʼ cadi nayádicame para gó binni laacame, peru riree ti ridxi raqué na: Biasa Pedru. Biiti ne gudó.

¡Coʼ! na Pedru. Qué huayuu dxi gahuaʼ ni cadi nayá. Peru ridxi que rabi laabe: Bisaana de guiniʼluʼ cadi nayá ni Dios caníʼ de que nayá. Chonna biaje raca ndiʼ. Laga caníʼ ique Pedru xi riníʼ ni gúcabe riʼ la? riuu ca hombre ni biseenda Corneliu chiyubi laabe que.

Pedru biete de ique yoo que ne riníʼ: Naa nga hombre cuyúbitu ca. Xi pur beedatu raríʼ. Ora ca hombre que rusiénecaʼ Pedru de que ti ángel gudxi Corneliu guni invitar Pedru ralidxi la? Pedru riníʼ de que ziné laacabe. Sti dxi que, Pedru ne ca xhamigu rigánnacabe Corneliu guidxi Cesarea.

Corneliu gulidxi ca binnilidxi ne ca ni jma xhamígube. Ora riuu Pedru la? Corneliu ruzuxibi xañeebe, casi rihuinni lu dibuju riʼ. Peru Pedru rabi laabe: Biasa, purtiʼ laaca hombre naa casi lii. Dxandíʼ, Biblia ruluíʼ de que cadi jneza diʼ nga guzuxíbinu xañee ti hombre para guni adorarnu laa. Jiobá si nga naquiiñeʼ guni adorarnu.

Pedru riniʼné cani nuu raqué de Stiidxaʼ Dios. Cayuuyaʼ de que Dios ricaa guiráʼ binni racalaʼdxiʼ guni ni ná, na Pedru rabi laacabe. Laga caniʼbe la? Dios ruseendaʼ espíritu santu stiʼ, ne ca binni que riniʼcaʼ gadxé gadxé diidxaʼ. Ca discípulo ni né Pedru que guizáʼ ridxagayaacabe, ruzulúcabe de que Dios jma nuu pur ca judíu ca. Ndiʼ rusiidiʼ laacabe de que Dios qué ruuyadiʼ ti raza si casi ni jma galán o jma risaca que sti raza. Ñee cadi dxandíʼ nga galán guietenaláʼdxinu ndiʼ la?

Hechos 10:1-48; 11:1-18; Apocalipsis 19:10.