Historia 110

Timoteu racané Pablu

HOMBREHUIINIʼ ni ruuyuʼ raríʼ ne Pablu ca nga Timoteu. Laabe nabézabe ne ca binnilídxibe guidxi Listra. Jñaabe láʼ Eunice ne jñaa bídabe láʼ Loida.

Ne ndiʼ maʼ chonna biaje chiganna Pablu guidxi Listra. Raca ti iza dede dxi primé guyé Pablu ne Bernabé raqué. Yanna Pablu maʼ bibiguetaʼ raqué ne xhamígube Silas.

Nannuʼ xi rabi Pablu Timoteu la? Ñee ñulaʼdxuʼ nineluʼ laadu la? Lii zanda gacaneluʼ laadu gucheechenu diidxaʼ ra nuu binni ni nabeza zitu.

Ñualaʼdxeʼ na Timoteu. Ngue runi, qué nindaadiʼ rusaana Timoteu ca binnilidxi ne rinebe Pablu ne Silas. Peru ante de guiziidinu de viaje stibe la? guidúʼyanu xi guca Pablu. Maʼ gudiʼdiʼ diecisiete iza dede dxi bihuinni Jesús nezalube ora zebe Damasco.

Bietenalaʼdxiʼ, Pablu guyé Damasco para guninabe ca discípulo stiʼ Jesús, peru yanna maʼ laapebe nácabe discípulo. Despué ruyubi tuudxi xhenemígube laabe para guuticaʼ laabe, peru ca discípulo que racanecaʼ laabe guxooñebe. Ruguucabe laabe ndaaniʼ ti dxumi ne rindétecabe laabe lu lindaa stiʼ guidxi que ne zaqué gunda bixooñebe.

Despué la? Pablu ridiʼdiʼ Antioquía para chigucheechebe diidxaʼ. Ne raqué nga biree lá ca discípulo que, cristianu. De raqué ruseendacabe Pablu ne Bernabé chigucheechecaʼ diidxaʼ ca guidxi roʼ nuu zitu que. Tobi de ca guidxi rigánnacabe nga Listra, ra nabeza Timoteu.

Yanna biaʼ ti iza despué Pablu ribiguetaʼ Listra lu guiropa viaje. Ora riné Timoteu Pablu ne Silas, nannuʼ paraa riécabe la? Biiya lu mapa riʼ, ne zacá zánnaluʼ.

Primeru riécabe Iconio, guidxi nuu jma gaxha, de raqué riécabe sti guidxi láʼ Antioquía. Despué riécabe Troas, ne ridíʼdicabe Filipos, Tesalónica ne Berea. Ñee ruuyuʼ Atenas lu mapa riʼ la? Pablu laaca rucheeche diidxaʼ guidxi ca. Despué, riucheechecabe diidxaʼ Corinto ne rindaacabe raqué ti iza arondaʼ. Últimu ra riécabe nga Efeso raqué qué nindaapeʼcabe. Oraqueruʼ riguíʼbacabe lu ti barcu ne ribiguétacabe Cesarea de raqué riécabe Antioquía, ne raqué riaana Pablu.

Ne zacá Timoteu runi viajar gayuaa kilómetru para gacanebe Pablu gucheechecabe diidxaʼ ne gucasaacabe stale binni para guidagulisaa. Ora guiniisiluʼ, zácaluʼ casi Timoteu, ti hombrehuiiniʼ ni qué nucheené Dios la?

Hechos 9:19-30; 11:19-26; capítulo 13 hasta 17; 18:1-22.

[Foto ni zeeda lu yaza 241]

Roma

Malta

Tesalónica

Berea

Corinto

Filipos

Atenas

Creta

Troas

Efeso

Mileto

Colosas

Antioquía

Iconio

Listra

Antioquía

Chipre

Damasco

Cesarea

Jope

Jerusalén

NISADÓʼ NAROʼBAʼ

(MEDITERRÁNIU)