Ca lindaa stiʼ Jericó
Historia 46
Ca lindaa stiʼ Jericó
XIÑEE cayaba ca lindaa stiʼ Jericó ca pue. Casi ora ti bomba biaba luguiáʼ cani. Peru dxiqué gastiʼ bomba; nin cañón. ¡Sti milagru stiʼ Dios ndiʼ! Guidúʼyanu ximodo gúcani.
Binadiaga ni Jiobá rabi Josué: Lii ne ca hombre ridinde stiuʼ lagudii bieque guidxi ca, lagudii bieque ni ti biaje lu ti dxi pur xhoopaʼ gubidxa, ne naquiiñeʼ chinetu guiña stiʼ pactu ca. Gadxe de ca ni ruzaaquiʼ guʼxhuʼ naquiiñeʼ saniruʼ nezalú ni, ne guxhídxicaʼ cachu sticaʼ.
Lu gadxe gubidxa ca la? lagudii bieque guidxi ca gadxe tiru. Óraque laguxhidxi cachu stitu ne guiratu lagucaa ti ridxi nadipaʼ. ¡Ne ca lindaa ca ziaba cani!
Josué ne ca binni guidxi que rúnicaʼ ni na Jiobá. Laga cudiicabe bieque la? guirácabe nuudxícabe. Nizi rixidxi nga ridxi stiʼ ca cachu que ne ñee cani cudii buelta que. Pabiáʼ bidxibi ca xhenemígucabe de Jericó yaʼ. Ruuyuʼ doo xiñáʼ nanda ra ventana ca la? Tu stiʼ ventana ca. Ya, stiʼ Rahab ni, laabe bíʼnibe cásipeʼ gudxi guiropaʼ ni yeundaachiʼ que laabe. Guiráʼ ca binnilídxibe nuuné laabe ndaaniʼ yoo, cundaachicaʼ.
Lu gadxe gubidxa despué de bidiicabe bieque guidxi que gadxe tiru la? bixhídxicabe ca cachu que ne ca hombre ridinde que ribidxiaacaʼ ne guiráʼ ca lindaa que riaba cani. Josué rabi laacabe: Laguuti ca binni ca ne laguzaaquiʼ guidxi ca ne guiráʼ ni nuu ndaaniʼ ni, peru cadi guzaaquitu plata, oro, guibayaa nin guiibaʼ, purtiʼ ca ndiʼ chécani ndaaniʼ tabernáculo stiʼ Jiobá.
Josué rábibe guiropaʼ ca ni yeundaachiʼ que: Lacuee Rahab ne guiráʼ binnilidxi de ndaaniʼ yoo ca. Ca binni diʼ rilacaʼ cásipeʼ bizabiruaa cani yeundaachiʼ que.
