Historia 49

Gubidxa que bizuhuaadxí

BIIYAʼ Josué. Laabe caniʼbe: ¡Gubidxa, cadi guiniibuʼ! Ne Gubidxa que bizuhuaadxí. Riaanadxini galaa guibáʼ guidubi ti dxi. ¡Jiobá nga bicueezadxini! Peru guidúʼyanu xiñee racalaʼdxiʼ Josué guzaaniruʼ Gubidxa ca.

Ora ca gaayuʼ rey malu de guidxi Canaán que ruzulú rucaalucaʼ Gabaón la? ca gabaonita ca ruseendacabe ti hombre chitidxi Josué gacané laacabe. ¡Gudáʼ ra nuudu nagueenda! na hombre que. ¡Bilá laadu! Guiráʼ ca rey ni nabeza ndaaniʼ ca dani ca cucaalú ca xpínniluʼ.

Josué ne ca hombre ridinde stiʼ oraqueca riecaʼ. Rizácabe guidubi gueelaʼ ne ora rindácabe Gabaón la? ca soldadu stiʼ ca gaayuʼ rey que ridxíbicaʼ ne ruzulú ruxooñecaʼ. Óraque Jiobá rusaaba jma hielu dede guibáʼ luguiácabe ne jma stale soldadu rati pur ca hielu ca que pur ca hombre ridinde stiʼ Josué.

Josué ruuyaʼ de que maʼ chiguiaazi Gubidxa ne zacahui, ne stale de ca soldadu stiʼ ca gaayuʼ rey malu que zuxooñecaʼ. Ngue runi Josué riniʼné Jiobá ne óraque riniʼbe: ¡Gubidxa, cadi guiniibuʼ! Ne Gubidxa que bizaaniruʼ, zaqué ca israelita que biʼniʼ ganarcaʼ guendaridinde que.

Nuu xcaadxi rey malu Canaán ni nanaláʼdxicaʼ xquidxi Dios. Xhoopaʼ iza riné Josué ne ca xpinni para guni ganárcabe ca 31 rey de guidxi que. Biluxe si ni la? Josué gundaabe guidxi ca lu ca tribu ni caquiiñeʼ layú.

Ridiʼdiʼ stale iza, oraqueruʼ rati Josué dxi napa 110 iza. Ca dxi nabánibe ne ca xhamígube que la? ca binni que bizuubacaʼ stiidxaʼ Jiobá. Peru ora laacabe ráticabe la? ca binni que puru si ni qué iquiiñeʼ rúnicaʼ ne riuucaʼ lu guendanagana. Yanna huaxa caquiiñecabe gacané Dios laacabe.

Josué 10:6-15; 12:7-24; 14:1-5; Jueces 2:8-13.