Ni bizabiruaa Jefté
Historia 53
Ni bizabiruaa Jefté
HUAYUU dxi huazabiruaaluʼ xiixa ni despué guca nagana para lii guʼnuʼ la? Zacapeʼ nga guca hombre cá lu dibuju riʼ, ne pur nga nuube triste. Labe Jefté, ti juez nadxibalú de Israel.
Jefté bibani dxi ca israelita que maʼ qué runi adorarcaʼ Jiobá. Laacabe cayúnicabe ni qué iquiiñeʼ sti tiru. Nga runi Jiobá rudii lugar guniná ca xpinni Ammón laacabe. Ca israelita ca rucaacabe ridxi Jiobá: Maʼ bichéʼnedu lii. ¡Bilá laadu!
Ca binni que guizáʼ feu riuucaʼ pur cani qué iquiiñeʼ bíʼnicaʼ. Rusihuínnicabe ni ra ribiguetaʼ runi adorárcabe Jiobá. Ngue runi, Jiobá racané laacabe sti biaje.
Ca binni guidxi que ribícabe Jefté para gucaalú ca ammonita que. Caquiiñepeʼ Jefté gacané Jiobá laa lu guendaridinde stiʼ. Ngue runi rábibe Jiobá: Pa lii gudiiluʼ lugar guneʼ ganar la? zudiéʼ lii primé binni guiree de ralidxeʼ gueeda guidxagalú naa ora guibiguetaʼ de lu guendaridinde riʼ.
Jiobá runadiaga ni bizabiruaa Jefté, ne laabe racanebe laa guni ganar. Ora Jefté ribiguetaʼ, nannuʼ tu primé binni ridxagalú laabe la? Tobi lucha xiiñibe. ¡Ay xiiñehuiineʼ! ruuna Jefté. ¡Xii nga biʼnuʼ naa pue! Peru naa bizaberuaa Jiobá xiixa, ne yanna qué zándadiʼ cue atrá de ni maʼ guniéʼ ca.
Ora ranna xiiñiʼ Jefté de ni maʼ bizabiruaa bixhoze la? laaca riuube triste pur gusaanabe bixhózebe ne ca xhamígube. Peru zúnibe ni na Jiobá guidubi naca xquendanabánibe ndaaniʼ tabernáculo stiʼ guidxi Siló. Ngue runi rábibe Jefté: Pa maʼ bizabiruaaluʼ xiixa ne Jiobá la? napuʼ xidé guʼnuʼ ni.
Ngue runi xiiñiʼ Jefté riebe guidxi Siló, ne rúnibe ni na Jiobá guidubi naca xquendanabánibe ndaaniʼ tabernáculo que. Ca gunaa de Israel rigánnacaʼ laabe tapa gubidxa lu ti iza ne guirácabe riuucabe nayecheʼ caadxi dxi. Ca binni que nadxiicaʼ xiiñiʼ Jefté purtiʼ rúnibe ni na Dios stibe, Jiobá.
