Historia 42

Ti burru ni riníʼ

HUAYUUDIAGUʼ ti burru guiníʼ la? Coʼ zaniúʼ xa, ca maniʼ ca qué riníʼdicaʼ. Peru ndaaniʼ Biblia na de que ti burru guníʼ. Guidúʼyanu ximodo guca ndiʼ.

Ca israelita ca maʼ nuucabe listu para chúʼcabe guidxi Canaán. Balac, rey stiʼ guidxi Moab, ridxíbibe ca israelita. Ngue runi, ruseendayúbibe ti hombre nuu xpiaaniʼ láʼ Balaam para gueeda ne gacalaʼdxiʼ mal para ca israelita ca. Nabe zudiibe laa stale bidxichi, ngue runi Balaam riguiʼbaʼ burru stiʼ ne riguuya Balac.

Jiobá qué racalaʼdxiʼ diʼ guinabaʼ Balaam mal para xquidxi. Ngue runi ruseendabe ti ángel ne ti guiibaʼ duxhuʼ para guzuhuaa lu neza stiʼ Balaam ne gucueezabe laa. Balaam qué ruuyaʼ ángel ca, peru burru stibe ruuyaʼ. Burru riʼ racalaʼdxiʼ guixeleʼ de ángel riʼ peru ni rúnitime ráʼtame lu neza que. Balaam ridxiichi stale ne riguiñe laame ne ti palu.

Despué la? Jiobá runi de que Balaam gunadiaga caniʼné burru que laa. Xi bineʼ lii para quiñu naa pue, na burru que rabi laabe.

Maʼ biʼnuʼ guihuinneʼ ti huati xa, na Balaam rabi laame. ¡Pa ñapa ti guiibaʼ duxhuʼ ñuuteʼ lii!

Huayuneʼ lii zacá ante la? na burru que.

Coʼ, na Balaam.

Óraque Jiobá runi de que Balaam guuyaʼ ángel que ne guiibaʼ duxhuʼ stiʼ zuhuaa galaa neza. Ángel que na: Xiñee gudiñuʼ burru stiuʼ pue, zeeda guseeguaʼ xnézaluʼ purtiʼ cadi naquiiñeʼ guinabuʼ mal para ca israelita ca. Pa burru stiuʼ qué nuxheleʼ lii de naa la? naa ñuuteʼ lii, peru laame qué ñúnediaʼ gastiʼ.

Balaam na: Maʼ bichee, qué ganna pa zuhuaaluʼ lu neza ca. Ángel que rudii lugar cheʼ Balaam, ne laabe riguuyarube Balac. Laabe racaláʼdxirube guiniʼbe mal de Israel peru Jiobá rucaa laabe cuʼbe ndaayaʼ Israel chonna tiru.

Números 21:21-35; 22:1-40; 23:1-30; 24:1-25.