Historia 37

Ti yoo ra gaca adorar

NANNUʼ xi yoo riʼ la? Ndiʼ nga ti yoo risaca para gaca adorar Jiobá. Biree lani tabernáculo. Ca binni xquidxi Dios biluxecabeni lu ti iza si despué de bireecabe Egipto. Nannuʼ tu guníʼ ique gácani la?

Jiobá nga guníʼ ique gácani. Laga dxiʼbaʼ Moisés lu dani Sinaí que la? Jiobá gudxi laabe ximodo gúnibe ni. Gúdxibe laa guni ni modo ganda guibiani nagueenda. Zacá zanda chinécabe ca ndaa ca sti lugar ne guquiidicabe ni stubi. Ngue runi ora maʼ zindeza ca israelita que sti lugar lu desiertu la? maʼ zinécabe yoo que.

Pa guuyuʼ ndaaniʼ cuartuhuiiniʼ ra riluxe yoo riʼ zuuyuʼ ti caja. Caja riʼ la? lani guiña stiʼ pactu. Cada ladu de guiña riʼ gúpani chupa ángel o querubín de oro. Dios bicaabe ca Chii Mandamientu que sti biaje lu xhupa guié bata, purtiʼ Moisés gundaabe chupa que. Ne ca guié riʼ la? guyuu chaahuiʼ cani ndaaniʼ guiña stiʼ pactu ca. Ne laaca guyuu chaahuiʼ ti guisu maná ndaaniʼ ni. Rietenalaʼdxuʼ xii nga maná la?

Jiobá gulibe Aarón biʼchiʼ Moisés para gaca xaíque stiʼ ca ni ruzaaquiʼ guʼxhuʼ. Laabe nga rusanírube ca binni que para guni adorarcaʼ Jiobá. Ne ca xiiñibe laaca nácacaʼ ni ruzaaquiʼ guʼxhuʼ.

Yanna biiyadxí ndaaniʼ cuartu jma naroʼbaʼ stiʼ yoo ca. Nápani chupa de biaʼ cuartuhuiiniʼ ca. Ruuyuʼ cajahuiiniʼ ra caree guʼxhuʼ ca la? Nga nga altar ra ruzaaquiʼ ca sacerdote ca guʼxhuʼ ni rindáʼ naxhi. Biiyaʼ candelabru ni napa gadxe lámpara ca. Ne guionna ni nuu ndaaniʼ cuartu ca nga ti mexaʼ, luni nuu doce pan.

Lu patiu stiʼ tabernáculo ca la? nuu ti palangana naroʼbaʼ, dxaʼ nisa. Ca ni ruzaaquiʼ guʼxhuʼ ca riquiiñecabe ni para quiibicabe xiixa. Raqueca nuu altar roʼbaʼ que. Luni ruzaaquicabe ca maniʼ ni maʼ biiticabe para gusigáʼdecabe Jiobá. Yoo ca nuuni galaa de ra nabeza ca israelita.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.