Ti yuzehuiiniʼ de oro
Historia 36
Ti yuzehuiiniʼ de oro
¡BIIYAʼ GUUYUʼ! Xi cayuni ca binni ca yanna pue. ¡Cayuni orárcabe ti yuzehuiiniʼ! Xiñee cayúnicabe ndiʼ yaʼ.
Ora rindaa Moisés lu dani que la? ca binni que riniʼcaʼ: Qué gánnanu xi guca Moisés. Gúninu ti dios ni cuee laanu de lu layú riʼ.
Buenu, na Aarón biʼchiʼ Moisés. Lacuee ca oro ni nándatu ca, ne latané ni naa. Ora ca binni que runi ndiʼ la? Aarón rusiá ca oro que ne rúnibe ti yuzehuiiniʼ de oro. Ne ca binni que nacaʼ: ¡Ndiʼ nga Dios stidu, ni gulee laadu de Egipto! Óraque rúnicaʼ ti saa roʼ, ne runi adorarcaʼ yuzehuiiniʼ de oro que.
Ora Jiobá ruuyaʼ ni cayúnicabe que la? ridxiichibe stale ne rábibe Moisés: Gucapurá biete, purtiʼ ca binni ca maʼ cadi cayúnicaʼ ni xneza. Maʼ bisiaandacabe ca ley stinneʼ ne cuzuxíbicabe nezalú yuzehuiiniʼ de oro ca.
Moisés riete guxooñeʼ de lu dani que. Ne ora ridxíñabe raqué la? ndiʼ nga ni ruuyabe. ¡Ca binni que cayuundacaʼ ne cuyaacaʼ ra nuu yuzehuiiniʼ que! Moisés ridxiichi stale dede rusáʼbibe guiropaʼ guié bata ra cá ca ley que, ne ca guié que rilaa cani. Óraque ricaabe yuzehuiiniʼ que rusiabe laa ne runidebe laa.
Ca binni guidxi que maʼ bíʼnicaʼ ni malu, ngue runi Moisés rábibe caadxi hombre cueecaʼ espada sticaʼ. Ca binni malu ni biʼniʼ adorar yuzehuiiniʼ ca napa xidé gati, na Moisés. ¡Ngue runi ca hombre que ruuticaʼ 3.000 binni! Ñee cadi ruluíʼ nga de que nápanu xi gápanu laanu para guni adorarnu Jiobá ne cadi xcaadxi dios ni cadi dxandíʼ la?
