Historia 71

Dios na zuni Guidxilayú riʼ ti paraísu

NDIʼ nga ti dibuju stiʼ ti paraísu ni zándaca biluíʼ Dios Isaías. Isaías nga ti ni riguixhená stiʼ Jiobá ni bibani despué de Jonás.

Diidxaʼ paraísu riʼ la? riniʼni «jardín» o «parque». Rusietenalaʼdxiʼ nga lii xiixa ni maʼ biiyaluʼ lu riʼ la? Ya, jardín sicarú ni biʼniʼ Dios para Adán ne Eva que. Peru, ñee raʼbuʼ zaca ndiʼ guidubi naca Guidxilayú la?

Jiobá gúdxibe Isaías gucaa de paraísu cubi ni zeeda para ca xpinni Dios. Sicaríʼ bicaabe: Gueuʼ ne dendxuʼ zabánicaʼ tobi si. Yuzehuiiniʼ ne lionhuiiniʼ zazacaʼ tobi si ne ti baʼduhuiiniʼ si zapa laacame. Nin baʼduhuiiniʼ ni quite gaxha de ti beendaʼ malu qué zaca gastiʼ.

Nécapeʼ stale tu zaníʼ: Qué ziuu dxi gaca nga, guidxilayú riʼ nabé huayuu guendananá ne laacani qué zaree diʼ cani. Peru guníʼ ique si, paraa guluu Dios Adán ne Eva para guibani yaʼ.

Dios guluu laacabe ndaaniʼ ti paraísu. Cumu qué nuzuubacabe stiidxaʼ Dios la? biníticabe paraísu que, bióʼxhocabe ne gúticabe. Dios na de que cani nadxii laabe zudiibe laacaʼ cani biniti Adán ne Eva que.

Ndaaniʼ paraísu ca la? maʼ guirutiʼ tu zuniná nin zunitilú. Ziuu guendariuudxi, ne guiráʼ binni ziuu nazaaca ne nayecheʼ casi gucalaʼdxiʼ Dios ñaca primé que. Despué zazíʼdinu ximodo chiguni Dios ndiʼ.

Isaías 11:6-9; Apocalipsis 21:3, 4.