Historia 62

Guendanagana ndaaniʼ lidxi David

DESPUÉ de bizulú David biʼniʼ gobernar Jerusalén la? Jiobá racané ca hombre ridinde stibe guni ganarcaʼ stale tiru luguiáʼ ca xhenemígube. Jiobá bizabiruaabe gudiibe ca israelita que guidxi Canaán. Ngue runi racanebe laacaʼ ne guidubi guidxi que raca stícabe.

David runi gobernarbe galán ne nadxiibe Jiobá. Ngue runi tobi de cani rúnibe despué de guicaabe Jerusalén nga chinebe guiña stiʼ pactu stiʼ Jiobá raqué. Laabe racaláʼdxibe gucuibe ti yuʼduʼ para uguubeni ndaaniʼ.

Caadxi iza despué la? David ruchee. Laabe nánnabe de que malu nga guicaa binni ni cadi stiʼ. Peru ti huadxí ora dxíʼbabe ique palaciu stibe la? biiyadxibe gueteʼ que ne biiyabe ti gunaa guizáʼ sicarú. Gunaa que láʼ Bat-seba ne xheelabe nga Urías ti soldadu stiʼ David.

David guyuláʼdxipebe Bat-seba dede rusendacaabe laa ndaaniʼ palaciu stibe. Xheelaʼ Bat-seba nuu zitu cadinde. David ratané gunaa riʼ ne despué ránnabe de que laa nacaxiiñiʼ, nga runi guizáʼ riuube xizaa ne rábibe Joab xaíque stiʼ ca hombre ridinde que uguu Urías delante ti gati lu guendaridinde que. Ora rati Urías la? David richaganáʼ Bat-seba.

Jiobá guizáʼ ridxiichiné David. Ruseendabe Natán para chiguiniʼné David de cani maʼ biʼniʼ. Zanda guʼyuʼ Natán lu riʼ ne David. David guizáʼ feu riuu pur cani biʼniʼ, ne Jiobá qué ruuti diʼ laabe. Peru rabi laabe: Purtiʼ maʼ bíʼniluʼ cani malu riʼ la? ziuu stale guendanagana ndaaniʼ lídxiluʼ. ¡Ne guendanagana ca rapa David xa!

Primeru la? rati xiiñiʼ Bat-seba. Óraque Amnón primé xiiñiʼ David rucaabe bizáʼnabe Tamar gatané laabe. Absalón xiiñiʼ David ridxiichibe stale ne ruutibe Amnón. Despué la? Absalón rucuudxibe ca binni que chuʼ pur laabe ti gúnicaʼ laabe rey. David runi ganar guendaridinde que, ne Absalón rati. Ya, David guizáʼ riuubaʼ ladxidoʼbe pur ca guendananá ca.

Lade guiráʼ ndiʼ la? Bat-seba rapa ti xiiñiʼ ni biree lá Salomón. Ora rioʼxhoʼ David ne raca huará la? Adonías xiiñibe racalaʼdxiʼ gaca rey. David rusendacaabe tobi de ca ni ruzaaquiʼ guʼxhuʼ ni láʼ Sadoc para gundaateʼ aceite ique Salomón ti guihuinni de que laabe nga chigácabe rey. Qué nindaa diʼ guti David dxi napa 70 iza. Maʼ biʼniʼ gobernarbe cuarenta iza. Yanna Salomón nga rey.

2 Samuel 11:1-27; 12:1-18; 1 Reyes 1:1-48.