Historia 67

Jehosafat runi cré de ladxidóʼ Jiobá

NANNUʼ tu ca hombre riʼ ne xi cayúnicabe la? Laacabe chitíndecabe, ne cani zaniruʼ ca la? cayuundacaʼ. Zándaca guinabadiidxuʼ: Xiñee qué gapa cani cayuunda ca, espada nin lanza para tindenecaʼ pue. Chiguidúʼyanu xiñee.

Jehosafat nga rey stiʼ chupa tribu de Israel. Bibánibe ca dxi bibani Acab ne Jezabel ca rey stiʼ chii tribu ni nabeza ladu guiaʼ. Peru Jehosafat naca ti rey nachaʼhuiʼ cásica guca bixhoze. Ngue runi pur stale iza ca binni stiʼ chupa tribu ni nabeza ladu gueteʼ que guizáʼ sicarú ribánicaʼ.

Peru yanna raca xiixa ni ruchibi ca binni que. Caadxi hombre rábicaʼ Jehosafat: Zeeda stale hombre ridinde de ca guidxi Moab, Ammón ne ca binni ni nabeza lu dani Seír zeeda gucaalucaʼ lii. Stale israelita ridaagucaʼ Jerusalén para guiníʼneca Jiobá ti gulá laacaʼ. Riécabe ra yuʼduʼ, ne raqué Jehosafat runi orar: Jiobá, Dios stidu, qué ganna diaʼ xi guneʼ, guizáʼ stale ca hombre riʼ ne laadu gastiʼ zanda gúnidu. Gucané laadu lii.

Jiobá rucaadiaga, ne rucaabe tobi de cani runi ni nabe chitidxi ca binni guidxi que sicaríʼ: Guendaridinde riʼ cadi stitu ni, sínuque stiʼ Dios ni. Cadi naquiiñeʼ diʼ tíndetu. Laguuyadxí si, ne laguuyaʼ ximodo rulá Jiobá laatu.

Ngue runi sti siadóʼ que na Jehosafat rabi ca binni que: ¡Laquixhe ladxidoʼto lu naʼ Jiobá! Óraque ruguucabe ca hombre ruundaʼ que nezalú ca soldadu que, ne laga zizácabe ziguundacabe para Jiobá. Nannuʼ xi raca ora ridxíñacabe para tíndecabe la? Jiobá rucaa ca xhenemígucabe tindesaacaʼ. ¡Ne ora rindá ca israelita que raqué la? ruuyacabe maʼ guti guiráʼ xhenemígucabe!

Guizáʼ guyuu xpiaaniʼ Jehosafat ra biʼniʼ cré Dios njaʼ. Laaca nuu xpiaaninu pa gúninu zaqueca.

1 Reyes 22:41-53; 2 Crónicas 20:1-30.