Historia 63

Salomón ti rey guizáʼ nuu xpiaaniʼ

NAHUIINIRUʼ Salomón reeda gaca rey. Nadxiibe Jiobá ne rúnibe guiráʼ ni gudxi bixhózebe laabe. Jiobá riuláʼdxibe modo Salomón, ngue runi ti gueelaʼ rábibe laa lu ti bacaandaʼ: Salomón, xi racalaʼdxuʼ gudiéʼ lii.

Salomón ricabi laabe: Jiobá, Dios stinneʼ, naa nahuiineruáʼ ne qué gannaʼ guneʼ gobernar. Nga runi, dané naa guendananna ti guneʼ gobernar guidxi stiuʼ jneza.

Jiobá guizáʼ riulaʼdxiʼ ni rinabaʼ Salomón. Nga runi nabe: Purtiʼ gunabuʼ guendananna ne qué ninabuʼ nibanu xadxí nin bidxichi la? zudiéʼ lii guendananna jma que ni huayapa tutiica binni ni huabani dede nagasi. Peru cadi ngasi diʼ, naa zudiéʼ lii cani qué ninabuʼ, ya, zudiéʼ lii stale bidxichi ne stale guendanaróʼ.

Gupa dxi chupa gunaa riné ti guendanagana ra nuu Salomón. Naa ne gunaa riʼ la? nabézadu ndaaniʼ ti yoo si, na ti gunaa que. Naa gupa ti baʼduhuiiniʼ ne chupa gubidxa despué la? laabe laaca gúpabe ti baʼduhuiiniʼ. Ti gueelaʼ xiiñibe guti, peru laga nisiaaseʼ la? laabe yendáquibe baʼduhuiiniʼ guti que cueʼ ne zinebe xiiñeʼ. Ora bibaneʼ biiyaʼ baʼduhuiiniʼ guti que la? gúnnacaʼ de que cadi xiiñeʼ diaʼ laabe.

Ora binadiaga sti gunaa que la? na: ¡Coʼ! ¡Ni nabani ca xiiñeʼ ne ni maʼ guti ca xiiñibe! Óraque ricabi primé gunaa que: ¡Coʼ! ¡Ni maʼ guti ca stiuʼ ne ni nabani ca stinneʼ! Zaqué nuu ca gunaa que cadíndecaʼ. Xi guni Salomón yanna pue.

Salomón rinabaʼ ti espada, ne ora redanécabe ni la? riniʼbe: Laugá baʼduhuiiniʼ nabani ca ne lagudii cada tóbicabe galaa galaa.

¡Coʼ! ribidxiaa ni dxandíʼ jñaa baʼduhuiiniʼ que. Cadi guutitu baʼduhuiiniʼ ca. ¡Lagudii laabe gunaa ca! Peru sti gunaa que na: Cadi gudiitu laabe nin tobi de laadu, laugá laabe chupa ndaa.

Óraque na Salomón: ¡Cadi guutitu baʼduhuiiniʼ ca! Lagudii laabe primé gunaa ca. Laabe nga dxandíʼ jñaa baʼduhuiiniʼ ca. Salomón biiyabe de que primé gunaa riʼ guizáʼ nadxii xiiñiʼ dede nuube gudiibe laa sti gunaa que para cadi guuticabe laa. Ora binadiaga ca binni que ximodo guleebe ca gunaa riʼ lu guendanagana stiʼ ca la? biéchecabe stale pur gápacabe ti rey guizáʼ nuu xpiaaniʼ.

Ca dxi biʼniʼ gobernar Salomón que la? Dios ruguu ndaayaʼ guidxi que, ne laxhiúcabe rudii stale trigu, cebada, uva ne duʼgaʼ ne xcaadxi cuananaxhi. Ca binni que ribáʼquicaʼ lari galán ne ribézacaʼ ndaaniʼ yoo sicarú. Ne casi ca ndiʼ nuu stale para guirácabe.

1 Reyes 3:3-28; 4:29-34.