Historia 59

Xiñee ruxooñeʼ David

DESPUÉ de ruuti David Goliat la? Abner xaíque stiʼ ca hombre ridinde stiʼ Israel, rinebe David ra nuu Saúl. Saúl runi laabe xaíque lade ca hombre ridinde stiʼ ne rúnibe de que David cueza ralidxi rey que.

Despué, ora ca hombre que bibiguétacaʼ de yetindenecaʼ ca filisteu que la? ca gunaa que ruundacaʼ: Saúl maʼ biiti mil, peru David chii mil. Saúl ridxiichi purtiʼ jma riuu naróʼ stiʼ David que laabe. Peru Jonatán xiiñiʼ Saúl cadi zacá diʼ laa, laabe nadxiibe David ne David nadxii laabe. Ngue runi guníʼ stiidxacabe cadi gusaanacabe de gaca xhamígucabe.

David guizáʼ galán ruxhidxi arpa, ne Saúl riulaʼdxiʼ ca saa ni ruxhídxibe. Peru ti dxi la? guendaridxiichi stiʼ Saúl bicaani laabe guninabe David. Laga cuxhidxi David arpa que la? Saúl rindisaʼ lanza stiʼ ne rulaabe ni David, ne nabe: ¡Chiguquiideʼ David cueʼ yoo ca! Peru David riree cueʼ de lanza que. Despué la? Saúl ruchee purtiʼ rulaabe lanza que David sti biaje. Yanna maʼ nánnabe de que naquiiñeʼ gápabe laabe guiráʼ ora.

Rietenalaʼdxuʼ ni bizabiruaa Saúl que la? Laabe guniʼbe de que zudiibe xiiñibe para guichaganáʼ hombre guuti Goliat. Saúl na rabi laabe, zanda guicaaluʼ xiiñeʼ Mical peru primeru napuʼ xidé guutiluʼ 100 filisteu. ¡Guníʼ ique si lii! Ni ribeza Saúl nga de que ca filisteu ca guuticaʼ David. Peru nga qué raca diʼ, ne Saúl rudii xiiñiʼ para guichaganáʼ David.

Ti dxi la? Saúl rábibe Jonatán ne guiráʼ mozo stibe de que racaláʼdxibe guutibe David. Peru Jonatán rabi laabe: Cadi guninaluʼ David, laabe qué huayúnibe lii gastiʼ. Laabe huayacanebe lii, dede guyuu xquendanabánibe ra naxoo ora gundindenebe Goliat que, ne ora lii biiyaluʼ laabe la? biécheluʼ.

Saúl bicaadiágabe xiiñibe, ne ruzabiruaabe maʼ qué zuninabe David. Nga runi redanécabe David sti tiru para guni ni na Saúl casi ante. Peru, ti dxi ora cuxhidxi David saa la? Saúl bilaabe lanza stibe luguiáʼ David sti biaje. Peru David riree cueʼ de lanza que ne laani ridaabini cueʼ yoo. ¡Ne ndiʼ maʼ chonna gúnibeni! ¡Yanna maʼ nánnabe de que naquiiñeʼ guxooñebe!

Gueelaʼ queca David rie ralidxi, peru Saúl ruseenda hombre chiguuti laabe. Mical nanna xi racalaʼdxiʼ bixhózebe guni. Rábibe David: Guyé yannagueelaʼ pacaa guixíʼ maʼ gútiluʼ. Huaxhinni queca gucanebe David guiree neza ra ventana. Ne biaʼ gadxe iza guzá David bicachilú pur Saúl, ne bicachilube gadxé gadxé laadu.

1 Samuel 18:1-30; 19:1-18.