Historia 87

Jesús hombrehuiiniruʼ laa nuu ndaaniʼ yuʼduʼ

BIIYAʼ hombrehuiiniʼ caniʼné ca hombre huaniisi ca. Laacabe nácacabe maistru ndaaniʼ yuʼduʼ stiʼ Dios ni nuu Jerusalén. Ne hombrehuiiniʼ ca nga Jesús, yanna maʼ biniisibe, maʼ nápabe 12 iza.

Ca maistru ca guizáʼ cadxagayaacaʼ purtiʼ Jesús nabé nanna de Dios ne de cani cá ndaaniʼ Biblia. Peru, xiñee qué guinni José ne María raríʼ pue. Paraa nuucabe pue. Guidúʼyanu.

Guiráʼ iza riné José ca binnilidxi Jerusalén para gápacabe ti saa roʼ ni láʼ Pascua. Guizáʼ zitu rizácabe dede Nazaret hasta Jerusalén. Dxiqué gastiʼ tren ne guirutiʼ gapa carru. Stale de ca binni que rizacaʼ, ngue runi laacabe yenécabe chonna gubidxa para yendácabe Jerusalén.

Para ca dxi riʼ la? ca binnilidxi José maʼ bidálecaʼ. Ngue runi José ne María naquiiñeʼ gápacabe xcaadxi biʼchihuiiniʼ ne bizaʼnahuiiniʼ Jesús. Biaʼsi ora cabiguétacabe xquídxicabe Nazaret iza que la? zacaxacabe zeeda Jesús lade guiráʼ binni que, maʼ ndaʼ guzácabe guidubi ti dxi oraqueruʼ biyúbicabe laabe lade guiráʼ ca binni que ne lade guiráʼ cani runibiáʼcabe, peru qué nidxeladíʼcabe laabe. Nga runi ribiguétacabe Jerusalén para chiyúbicabe laabe raqué.

Hasta que ridxélacabe laabe raríʼ, cucaadiágabe ca maistru ca ne canabadiidxabe laacaʼ. Ne guiráʼ binni que cadxagayaacaʼ pabiáʼ nánnabe. Peru María rabi laabe: Xiiñeʼ, xiñee biʼnuʼ ndiʼ laadu pue. Naa ne bixhoʼzoʼ guizáʼ nuudu xizaa ne cuyúbidu lii.

Xiñee cuyúbitu naa yaʼ, na Jesús. Qué gánnatu de que naa napa xi chuaa ralidxi Bixhozeʼ la?

Ya, Jesús guizáʼ riulaʼdxiʼ chuʼ ra ganda guiziidiʼ de Dios. Laanu laaca naquiiñeʼ gácanu zacá. Dxi nuu Jesús Nazaret la? laabe guyebe ca reunión que guiráʼ semana para guni adorarbe Dios. Ne cumu nabé bicaadiágabe cani la? biziidibe stale de ndaaniʼ Biblia. Laanu laaca naquiiñeʼ gúninu casi biʼniʼ Jesús.

Lucas 2:41-52; Mateo 13:53-56.