Historia 94

Jesús nadxii baʼduhuiiniʼ

BIIYAʼ Jesús guiidxi hombrehuiiniʼ ca. Zanda gúʼyaluʼ de que laabe nadxiibe ca baʼduhuiiniʼ ca. Ca hombre cayuyadxí ca nga ca apóstol stibe. Nannuʼ xi cayabi Jesús laacabe la?

Jesús ne ca apóstol stiʼ casi bedandácabe de ti viaje. Neza zeeda ca apóstol que la? zeeda dinde diidxacabe. Ngue runi, despué de viaje que la? Jesús gunabadiidxaʼ laacabe: Xii nga zeeda dinde diidxatu neza pue. Peru Jesús maca nanna xidé gudinde diidxacabe. Laabe gunabadiidxasibe ngue laacaʼ para gúʼyabe pa zábicaʼ laabe.

Ca apóstol que, qué nicábidicaʼ purtiʼ ora zeedacabe neza la? zeeda dinde diidxacabe tuu nga jma dxiibaʼ ládecabe. Caadxi de laacabe racalaʼdxiʼ guisaca jma que xcaadxi que. Ximodo gabi Jesús laacabe de que cadi jneza diʼ nga gacaláʼdxicabe guisácacabe yaʼ.

Jesús rucaa ridxi ti hombrehuiiniʼ ne ruzuhuaabe laa nezalú guiráʼ ca apóstol que. Óraque rábibe laacaʼ: Gábecaʼ laatu: Pa cadi guchaatu ne gácatu casi hombrehuiiniʼ la? qué ziuu dxi chuutuʼ lu reinu stiʼ Dios. Ca binni jma risaca ndaaniʼ reinu stiʼ Dios nga cani gaca casi hombrehuiiniʼ riʼ. Nannuʼ xiñee guníʼ Jesús ca diidxaʼ riʼ la?

Purtiʼ ca baʼduhuiiniʼ ca, qué riníʼ íquecaʼ guisácacaʼ nin gácacaʼ jma naróʼ. Ngue runi, ca apóstol que naquiiñepeʼ nga niziidicaʼ ñácacaʼ casi baʼduhuiiniʼ ne cadi nidíndecaʼ pur gácacaʼ naróʼ o guisácacaʼ.

Despué la? Jesús laaca rusihuinni pabiáʼ nadxiibe baʼduhuiiniʼ. Chupa chonna beeu despué la? caadxi binni bedanecaʼ xiiñicaʼ ra nuu Jesús. Ca apóstol que gucaláʼdxicaʼ nucueezacaʼ laacabe. Peru Jesús rabi laacaʼ: Lagudii lugar gueeda ca baʼduhuiiniʼ ca ra nuaa, ne cadi gucueezatu laacabe, purtiʼ stícabe nga reinu stiʼ Dios. Óraque riguiidxibe laacaʼ ne ruguube ndaayaʼ laacaʼ. Guizáʼ galán nga gánnanu de que Jesús nadxiibe ca baʼduhuiiniʼ ca njaʼ.

Mateo 18:1-4; 19:13-15; Marcos 9:33-37; 10:13-16.