Jesús rale ndaaniʼ ti currá
Historia 85
Jesús rale ndaaniʼ ti currá
NANNUʼ tu baʼduduutu riʼ la? Ya, laabe nga Jesús. Cásipeʼ gúlebe ndaaniʼ ti currá ra riapaʼ ca maniʼ ca. María caguíxhebe Jesús ra ro ca maniʼ ca guixi. Peru xiñee nuu José ne María ra nuu ca maniʼ ca pue. Raríʼ cadi para gale diʼ baʼduhuiiniʼ.
Nuucabe raríʼ purtiʼ Augusto César, hombre cayuni gobernar guidxi Roma que bíʼnibe ti ley ni na: Guiráʼ binni guibiguetaʼ guidxi gule para gucaacaʼ lacaʼ ndaaniʼ ti libru. Ngue runi José guyé Belén purtiʼ raqué gúlebe. Peru ora guyuube raqué laabe ne María la? qué nidxélacabe ra ñaanacabe. Pur nga runi, nuucabe ra nuu ca maniʼ ca. Ne dxi queca María gupa Jesús. Peru casi ruuyuʼ lu dibuju riʼ, laabe nazaaca nuube.
Biiyaʼ yanna ca ni rapa dendxuʼ ca, zeeda guuyacabe Jesús. Huaxhinni que nuucabe lu layú cayápacabe dendxuʼ stícabe ora bizaaniʼ ti biaaniʼ gaxha de laacabe. ¡Naca si ni ti ángel! Ca ni cayapa dendxuʼ que bidxíbicaʼ, peru ángel que na rabi laacabe: ¡Cadi guidxíbitu! Niáʼ diidxaʼ nacubi ne galán para laatu. Yannadxí gule Cristu guidxi Belén. Laabe zulabe guidxi riʼ. Zadxélatu laabe réndabe lari ne néxhebe ra ro maniʼ guixi. Málasi zeeda xcaadxi ángel ne bizulú bisisácacaʼ Dios. Oraqueca ca ni rapa dendxuʼ que ziyúbicabe Jesús ne bidxélacabe laa.
Nannuʼ xiñee nabé risaca Jesús la? Nannuʼ tupeʼ nga laabe la? Bietenalaʼdxiʼ, lu primé historia stiʼ libru riʼ guninu de primé Xiiñiʼ Dios. Laabe bíʼninebe Jiobá guibáʼ ne Guidxilayú ne guiráʼ xixé ni nuu luni. Laabe nga Jesús.
Ya, Jiobá gucuaa xquendanabani Xiiñiʼ dede guibáʼ ne guluube laa ndaaniʼ María. Ne bizulú biniisi baʼduhuiiniʼ riʼ cásica riniisi xcaadxi baʼduhuiiniʼ ndaaniʼ jñaa. Peru Xiiñiʼ Dios nga baʼduhuiiniʼ riʼ. De raqué la? gúlebe ndaaniʼ ra ro maniʼ guixi ndaaniʼ guidxi Belén. Ruuyuʼ yanna xiñee biecheʼ ca ángel que ora gúdxicabe ca binni que maʼ gule Jesús la?
