Historia 96

Jesús rusianda binni huará

LAGA zeʼ Jesús ca guidxi que la? zigusiándabe binni huará. Ne stale de ca guidxi nuu gaxha de raqué la? ránnacabe de ca milagru riʼ. Nga runi, ca binni que rinecaʼ ra nuube cani nachiita ñee ne nacheepaʼ lú, ne cani qué runadiaga, ne stáleruʼ binni huará. Ne Jesús rusianda guirácabe.

Maʼ gudiʼdiʼ chonna iza dede dxi Juan guluunisa Jesús. Yanna Jesús rabi ca apóstol stiʼ de que, qué zandaadiʼ ziécabe Jerusalén, ra zuuticabe laabe ne despué ziásabe de lade gueʼtuʼ. Laga zebe la? zigusiándabe binni huará.

Ti dxi Jesús cusiidiʼ dxi sábadu. Dxi sábadu ca la? ti dxi de guendarizilaʼdxiʼ ni para ca judíu ca. Gunaa ni ruuyuʼ raríʼ la? maʼ nápabe dieciocho iza de napandu déchebe ne qué huayanda guzuhuaabe derechu. Nga runi, Jesús ribaquináʼ luguiabe ne laabe ruzuhuaabe derechu. ¡Riándacabe!

Ni biʼniʼ Jesús riʼ la? bichiichini ca xaíque stiʼ ca religión que. Nuu xhoopaʼ gubidxa para gaca dxiiñaʼ, na tobi de ca xaíque que rabi guiráʼ binni que. ¡Nga nga ca dxi para gueeda guiándatu ne cadi dxi sábadu diʼ!

Peru Jesús ricabi: ¡Ni qué iquiiñecaʼ! Tutiica de laatu nuxhegueʼ burru stiʼ ne ni ugueʼ laame nisa dxi sábadu. Nga runi, ñee cadi naquiiñeʼ guianda pobre gunaa ni maʼ napa dieciocho iza de huará riʼ la? Ni bicabi Jesús riʼ bisituí ni lú ca hombre qué iquiiñeʼ que.

Despué la? Jesús ne ca apóstol stiʼ riecaʼ Jerusalén. Ora ridxíñabe gaxha de guidxi Jericó la? chupa hombre nacheepaʼ lú canabaʼ guna rucaacaʼ ridxi: Jesús gucané laadu.

Jesús rucaa ridxi cani nacheepaʼ lú que ne rinabadiidxabe laacaʼ: Xi racaláʼdxitu guneʼ laatu. Ca hombre que na caʼ: Señor bixhaleʼ ludu. Jesús rigaʼnaʼ lúcabe, ¡ne oraqueca ruuyacabe! Nannuʼ xiñee runi Jesús guiráʼ milagru riʼ la? Purtiʼ nadxiibe binni ne racaláʼdxibe gápacabe fe laabe. Ndiʼ ruluíʼ laanu de que dxandipeʼ ora Jesús guni gobernar la? maʼ guirutiʼ zaca huará lu Guidxilayú riʼ.

Mateo 15:30, 31; Lucas 13:10-17; Mateo 20:29-34.