Historia 91

Jesús rusiidiʼ lu ti dani

BIIYAʼ Jesús zuba raríʼ. Cusiidibe guiráʼ binni ca lu ti dani stiʼ Galilea. Cani zuba jma gaxha de laabe nga ca discípulo stibe. Laabe maʼ gulibe doce de laacabe para gaca apóstol stibe. Ca apóstol ca la? nácacabe discípulo ni jma riuunú Jesús para guiziidicaʼ. Nannuʼ tu lácabe la?

Tobi ca láʼ Simón Pedru ne bíʼchibe láʼ Andrés. De raqué zeeda Jacobo (Santiagu) ne Juan, laacabe laaca bíʼchicabe. Sti apóstol que laaca láʼ Santiagu ne stobi que láʼ Simón. Chupa de ca apóstol que láʼ Judas. Tobi ca láʼ Judas Iscariote ne sti Judas que laaca láʼ Tadeu. Laaca nuu Felipe ne Natanael (ni laaca láʼ Bartolomé), ne Mateu ne Tomás.

Despué de ribiguétacabe de Samaria la? Jesús ruzulú riníʼ: Reinu stiʼ Dios maʼ bidxiña. Nannuʼ xii nga reinu ca la? Nga nga gobiernu ni dxandíʼ zeeda de Dios. Jesús nga rey ca, ne laabe nga zuni gobernarbe dede guibáʼ ne zeedanebe guendariuudxi lu Guidxilayú riʼ. Reinu stiʼ Dios riʼ laaca zuni guidubi naca Guidxilayú riʼ ti paraísu.

Raríʼ ruuyuʼ Jesús cusiidibe guiráʼ binni de reinu ca. Sicaríʼ nga naquiiñeʼ guni orartu, na Jesús rabi laacabe. Bixhózedu ni nuu guibáʼ, rinábadu gusisaca guiráʼ binni laluʼ. Biseenda reinu stiuʼ. Gaca ni naluʼ, cásica guibáʼ zaqueca lu Guidxilayú. Stale binni rábicabe oración riʼ padrenuestro. Ñee zanda guiniʼluʼ guidubi oración riʼ la?

Jesús laaca cusiidiʼ ca binni riʼ ximodo gácacabe ne xcaadxi binni. Biʼniʼ laacabe ni racalaʼdxuʼ gúnicabe lii, na Jesús rabi laacabe. Ñee qué riulaʼdxuʼ ora rácacabe nachaʼhuiʼ ne lii la? Nga runi, naquiiñeʼ gácanu nachaʼhuiʼ ne xcaadxi binni. ¡Pabiáʼ galán zaca lu Guidxilayú riʼ ora maʼ nácani ti paraísu ne guiráʼ binni ca gaca nachaʼhuiʼ!

Mateo, capítulo 5 hasta 7; 10:1-4.