Historia 101

Ruuticabe Jesús

¡BIIYA SI pabiáʼ feu ni cayaca riʼ! Cayuuticabe Jesús. Daabi clavu nabe ne ñeebe, cabe lu yaga ca. Xiñee gucalaʼdxiʼ tuuxa guni ndiʼ Jesús pue.

Purtiʼ chupa chonna de ca binni que raca nanaláʼdxicaʼ Jesús. Ñee nannuʼ tu ca binni riʼ la? Tobi de laacabe nga ángel qué iquiiñeʼ ni láʼ Binidxabaʼ. Laabe nga bicaabe Adán ne Eva cadi guzuubacaʼ stiidxaʼ Jiobá. Ne laaca Binidxabaʼ nga bicaa ca binni ca guuticaʼ Jesús.

Ante gucaacabe Jesús lu yaga que la? ca xhenemígube guizáʼ bininacaʼ laabe. Rietenalaʼdxuʼ de que guyécabe ndaaniʼ jardín stiʼ Getsemaní que ne zinécabe laabe la? Tuu ndiʼ ca ni guyé riʼ yaʼ. Nga nga ca xhenemígube, ca xaíque stiʼ ca religión que. Guidúʼyanu xi raca despué.

Ora ca xaíque stiʼ ca religión que rinecaʼ Jesús la? ca apóstol stibe ruxooñecaʼ. Ridxíbicabe ne rusaanacabe laabe stúbibe lu naʼ ca xhenemígube. Peru apóstol Pedru ne Juan qué riecaʼ zítupeʼ. Zinándacabe ca binni que para gúʼyacabe xi rizaaca Jesús.

Ca ni ruzaaquiʼ guʼxhuʼ que rinécabe Jesús ra nuu Anás, binnigola ni guca xaíque stiʼ ca ni ruzaaquiʼ guʼxhuʼ. Ca binni que, qué rindaapecaʼ raqué, purtiʼ rinécabe laabe ralidxi Caifás, ni naca xaíque stiʼ ca ni ruzaaquiʼ guʼxhuʼ que. Raqué nuu stale de ca ni ruzaaquiʼ guʼxhuʼ.

Ralidxi Caifás riʼ cayuni juzgárcabe Jesús ne redanécabe caadxi hombre para guiníʼ paraa bichee Jesús neca cadi dxandíʼ cani guiniʼcaʼ. Guiráʼ ca xaíque stiʼ ca religión que riniʼcaʼ: Naquiiñeʼ gati Jesús. Óraque ruchaxhínnicabe lube ne rudiicabe jma puñete laabe.

Laga cayaca ndiʼ la? Pedru nuu fuera lu patiu que. Gueelaʼ que nabé nananda, nga runi ca binni que rúnicabe gui para guidxaacabe. Laga cadxaacabe gaxha de gui que la? ti criada ruuyabe Pedru ne riniʼbe: Hombre riʼ laaca xpinni Jesús laa.

¡Coʼ, na Pedru, naa cadi xpinni diʼ Jesús naa! Chonna tiru gudxi ca binni que Pedru de que xpinni Jesús laa. Peru cada gábicabe ni laabe la? riniʼbe de que coʼ. Lu guionna tiru guniʼbe coʼ la? Jesús biiyadxí laabe. Pedru guizáʼ riuube triste purtiʼ bisiguiibe, nga runi riebe ti ladu riguunabe.

Viernes siadóʼ que, ca ni ruzaaquiʼ guʼxhuʼ que rinécabe Jesús ndaaniʼ Sanedrín ra ridagulisaacabe. Raqué ruuyacabe xi guninécabe laabe. Rinécabe laabe ra nuu Poncio Pilatu, gobernador stiʼ guidxi Judea.

Ca binni que rábicabe Pilatu, hombre riʼ nabé malu laa. Naquiiñeʼ gátibe. Despué de rinabadiidxaʼ Pilatu Jesús la? laabe riniʼbe: Naa qué guuyadiáʼ xiixa ni malu luguiáʼ hombre riʼ. Pilatu runi mandarbe chinécabe Jesús nezalú Herodes Antipas, gobernador stiʼ guidxi Galilea ni nuu Jerusalén. Hombre riʼ laaca qué ruuya diʼ gastiʼ luguiabe, nga runi rudxiguétabe Jesús ra nuu Pilatu.

Pilatu nuube gundaabe Jesús. Peru ca xhenemigu Jesús nuucaʼ gundaa Pilatu sti hombre daguyoo ni nabé riree lu binni láʼ Barrabás. Biaʼ galaadxí que ribee Pilatu Jesús fuera. Ne rábibe ca binni que: ¡Laguuyaʼ! ¡Rey stitu! Ca ni jma risaca ni ruzaaquiʼ guʼxhuʼ que ricábicaʼ: ¡Biiti laabe! Zacá rilaa Barrabás ne rinécabe Jesús para guuticabe laa.

Viernes huadxí que rucaacabe laabe lu yaga. Neca qué rihuinni lu dibuju ca, peru laaca rucaacabe xhupa hombre malu cueʼ Jesús para gati. Ante gati Jesús la? tobi de ca hombre malu que rabi laabe: Bietenalaʼdxiʼ naa ora chuʼluʼ lu reinu stiluʼ. Jesús ricabi laabe: Dxandipeʼ cayabe lii de que ziuuneluʼ naa ndaaniʼ Paraísu.

¡Guizáʼ sicarú ni bizabiruaa Jesús riʼ njaʼ! Nannuʼ xi paraísu nga caníʼ Jesús la? Paraa guyuu paraísu ni biʼniʼ Jiobá primé que yaʼ. Ya, lu Guidxilayú riʼ. Ne ora laabe guni reinarbe guibáʼ la? laabe zandísabe hombre riʼ para guiecheʼ ndaaniʼ paraísu cubi ca lu Guidxilayú riʼ. Ñee cadi dxandíʼ galán ndiʼ la?

Mateo 26:57-75; 27:1-50; Lucas 22:54-71; 23:1-49; Juan 18:12-40; 19:1-30.