Historia 77

Gastiʼ nucaa laacabe nusuxíbicabe

RIETENALAʼDXUʼ guionnaʼ hombrehuiiniʼ riʼ la? Ya, laacabe nga ca xhamigu Daniel cani qué niná ñó guendaró ni cadi jneza gócabe que. Ca babiloniu ca gulee lá laacabe Sadrac, Mesac ne Abednego. Peru biiyaʼ laacabe yanna. Xiñee cadi cusuxíbicabe lu bidóʼ ngola riʼ cásica cayuni xcaadxi binni ca yaʼ. Chiguidúʼyanu xiñee.

Rietenaláʼdxiluʼ ca ley bicaa Jiobá, cani láʼ Chii Mandamientu que la? Primé ley que na: Cadi guni adorarluʼ xcaadxi dios sínuque que naa si. Ca hombrehuiiniʼ riʼ cuzuubacabe diidxaʼ stiʼ ley ca raríʼ nécaxa nagana ni para laacabe.

Nabucodonosor, rey stiʼ Babilonia bisendacaabe stale binni risaca para gusuxibi nezalú bidóʼ bíʼnibe riʼ. Laabe gúdxibe ca binni riʼ: Ora gunadiágatu ridxi stiʼ ca cachu ca, stiʼ arpa ne xcaadxi guiibaʼ rixidxi ca la? lausuxibi ne laguni adorar bidóʼ de oro riʼ. Tu cadi guni ni la? oraqueca zalaa ndaaniʼ ti horno nandáʼ.

Ora riuudiaga Nabucodonosor de que Sadrac Mesac ne Abednego qué rusuxíbicaʼ la? ridxiichibe stale. Ne rusendacaabe laacaʼ ra nuube ne sti biaje ca gúdxibe laacaʼ de que naquiiñeʼ gusuxíbicaʼ. Peru ca hombrehuiiniʼ que gudíxhecabe ladxidócabe lu naʼ Jiobá. Ngue runi nácabe, Dios stidu ni cayúnidu ni ná zulá laadu, peru neca qué gúnibe ni la? laadu qué zazuxíbididu nezalú bidóʼ de oro ca.

Ora binadiaga Nabucodonosor ni guníʼcabe que la? jma ridxiichibe. Óraque runi mandarbe: ¡Lagusindáʼ horno ca gadxe tiru! Óraque rábibe ca hombre ni jma nadipaʼ nápabe gundiibicaʼ Sadrac, Mesac ne Abednego ne gulaacabe laacaʼ ndaaniʼ horno que. Guizáʼ nandáʼ ni dede ruuti ni ca hombre nadipaʼ que. Peru, xi raca guionnaʼ hombrehuiiniʼ bilaacabe ndaaniʼ horno que yaʼ.

Rey que ruuyaʼ ndaaniʼ horno que, ne guizáʼ ridxíbibe. Ñee cadi chonna hombrehuiiniʼ nga bindiibinu ne bilaanu ndaaniʼ horno nandáʼ ca la? na rey que:

Ya, nga bíʼninu na ca hombre stiʼ rey que.

Peru naa cayuuyaʼ tapa hombre canazá lu gui riʼ na rey que rabi laacabe. Cadi liibidíʼcabe, ne cadi cayáʼquicabe. Ne tobi de laacabe ruluíʼ ti dios. Rey que ridxiña gaxha de horno que ne rucaa ridxi: ¡Sadrac! ¡Mesac! ¡Abednego! ¡Laguiree xpinni Dios ni nandxóʼ!

Ora rireecabe la? guiráʼ binni que ruuya de que laacabe qué ñacadíʼcabe gastiʼ. Óraque rey que guníʼ: ¡Guisaca Dios stiʼ Sadrac, Mesac, ne Abednego! Maʼ biseendabe ángel stibe gulá laacabe purtiʼ gastiʼ nucaa laacabe nuzuxíbicabe ne ñuni adorárcabe sti dios sínuque Dios stísicabe.

Ñee cadi naquiiñeʼ gácanu casi ca hombrehuiiniʼ riʼ de cadi gucheenenu Dios la?

Éxodo 20:3; Daniel 3:1-30.