Historia 115

Ti paraísu nacubi lu Guidxilayú riʼ

BIIYAʼ ca yaga nasoo riʼ, ca guieʼ sicarú riʼ ne ca dani ngola ca. Ñee cadi dxandíʼ sicarupeʼ guiráʼ ndiʼ la? Biiyaʼ bidxiñahuiiniʼ cayó ndaaniʼ náʼ hombrehuiiniʼ ca. Ne biiyaʼ ca lión ne caballu zuhuaa lu ca guixi gaʼ ca. Ñulaʼdxuʼ nibezuʼ ndaaniʼ ti yoo o ti lugar sicaríʼ la?

Dios racalaʼdxiʼ guibániluʼ sin qué chuʼ dxi gátiluʼ ndaaniʼ ti paraísu lu Guidxilayú riʼ, ne sin tiidiluʼ ca guendaná ni cadiʼdiʼ stale binni yanna. Nga nga ni caníʼ Biblia para cani guibani ndaaniʼ paraísu ca. Dios ziuuné laacabe. Maʼ qué ziuuruʼ guendaguti nin guendaruunaʼ nin yuubaʼ. Purtiʼ maʼ gudiʼdiʼ guiráʼ cani guyuu dxiqué.

Jesús nga chiguni ca guendaridxagayaa riʼ. Nannuʼ padxí la? Despué de cueebe guiráʼ guendaquéiquiiñeʼ ne guiráʼ ca binni malu nuu lu Guidxilayú riʼ. Bietenalaʼdxiʼ, dxi guyuu Jesús lu guidxilayú bisiándabe guiráʼ guendahuará stiʼ ca binni que, ne dede bisibánibe caadxi ni maʼ guti. Zacá bisihuínnibe ni chigúnibe lu guidubi naca Guidxilayú riʼ casi Rey stiʼ reinu stiʼ Dios.

¡Guníʼ ique si pabiáʼ galán zaca chuʼnu ndaaniʼ paraísu nacubi ca! Jesús, ne caadxi de cani ribibe la? zuni gobernarnebe laacaʼ guibáʼ. Laacabe chiguni tendércabe guiráʼ tu guiaana lu guidxilayú riʼ ne zuuyacabe guibánicaʼ nayecheʼ luni. Guidúʼyanu xi naquiiñeʼ gúninu ti ganda gudii Dios laanu guendanabani ni qué ziuu dxi guiluxe ndaaniʼ paraísu nacubi stiʼ.

Apocalipsis 21:3, 4; 5:9, 10; 14:1-3.