Historia 5

Ti guendanabani nagana

BIREESICABE ndaaniʼ jardín de Edén que la? Adán ne Eva gúpacaʼ stale guendanagana. Gúpacabe xidé bíʼnicabe dxiiñaʼ naná para gócabe. Biiyacabe maʼ qué nindani yaga cuananaxhi ra nuucabe, sínuque gundani yaga guichi ne yaga guiʼxhiʼ. Ndiʼ gúcani ora Adán ne Eva maʼ qué nuzuubacabe stiidxaʼ Dios ne bisaanacabe de gaca xhamígucabe Laabe.

Peru ni jma feu nga Adán ne Eva bizulú gúticaʼ. Bietenalaʼdxiʼ: Dios gudxi laacabe de que záticabe pa laacabe gócabe cuananaxhi stiʼ ti yaga que. Buenu, dxi ca gudócabe cuananaxhi que la? bizulú gúticabe. ¡Aque nahuáticabe purtiʼ qué nucaadiágacabe Dios!

Guiráʼ ca xiiñiʼ Adán ne Eva gúlecaʼ despué de gulee Dios laacabe ndaaniʼ jardín de Edén que. Ndiʼ riníʼ de que ca xiiñicabe laaca napa xidé guióʼxhocaʼ ne gáticaʼ.

Pa Adán ne Eva nuzuubacabe stiidxaʼ Jiobá la? laacabe ne ca xiiñicabe ñuucabe nayecheʼ. Ñanda nibánicabe nayecheʼ sin ñuu dxi ñáticabe lu Guidxilayú riʼ. Maʼ guirutiʼ ñoʼxhoʼ nin ñaca huará ne ñati.

Dios racalaʼdxiʼ guibani binni nayecheʼ sin chuʼ dxi gati, ne laabe maʼ guniʼbe de que ziuu dxi zácani zacá. Cadi zaca si guidubi Guidxilayú riʼ sicarú, sínuque guiráʼ xixé binni ziuu nazaaca. Ne guirácabe zaca xhamígucabe, ne laaca zaca xhamígucabe Dios.

Peru Eva maʼ cadi xhamígudibe Dios. Ngue runi guca nagana para laabe gápabe xiiñibe, purtiʼ gúpabe stale yuubaʼ. Ya, dxandíʼ pur qué nuzuubabe stiidxaʼ Jiobá la? bedané ni stale yuubaʼ laabe, cadi dxandíʼ la?

Adán ne Eva gúpacabe stale xiiñicabe. Ora gule primé xiiñicabe la? gulee lácabe laa Caín. Ra biropa que la? gulee lácabe laa Abel. Ñee nannuʼ xi gúcacabe la?

Génesis 3:16-23; 4:1, 2; Apocalipsis 21:3, 4.