Historia 7

Ti hombre nadxibalú

DXI bidale binni ndaaniʼ Guidxilayú riʼ la? stale de laacaʼ bíʼnicaʼ ni qué iquiiñeʼ casi biʼniʼ Caín. Peru ti hombre guca gadxé que laacabe. Hombre riʼ biree labe Enoc. Laabe gúcabe ti hombre nadxibalú. Guiráʼ ca binni bibani ca dxi stibe que gúcacaʼ binni qué iquiiñeʼ, peru laabe qué nusaanabe de ñúnibe ni na Dios.

Nannuʼ xiñee ca binni que bíʼnicaʼ puru si ni qué iquiiñeʼ la? Bietenalaʼdxiʼ: Tu biʼniʼ de que Adán ne Eva cadi nuzuubacabe stiidxaʼ Dios ne gócabe de cuananaxhi ni Dios gudxi laacabe cadi gócabe. Ti ángel malu. Biblia ribee lá laabe Binidxabaʼ. Ne laabe nuube gácanu malu casi laabe.

Ti dxi Jiobá gúdxibe Enoc gabi ca binni que xiixa ni qué ñacaláʼdxicaʼ nucaadiágacaʼ. Ndiʼ nga guniʼbe: Ti dxi la? Dios zunduuxeʼ guiráʼ ca binni malu ca. Zándaca bichiichi ndiʼ ca binni que, ne laaca zándaca gucaláʼdxicaʼ ñuuticaʼ Enoc. Ngue runi, Enoc gúpabe xidé gúcabe ti hombre nadxibalú ti ganda gábibe ca binni que ni chiguni Dios.

Dios qué nudii diʼ lugar nibani Enoc stale iza lade ca binni malu que. Laabe bibánibe 365 iza si. Xiñee riniʼnu de que «365 si» yaʼ. Purtiʼ dxiqué la? ca hombre que nabé nadípacabe ne jma xadxí ribánicabe que ca hombre ni nuu yanna. ¡Dxandíʼ, Matusalén xiiñiʼ Enoc bibani 969 iza!

Despué de guti Enoc la? ca binni que gúcacaʼ jma malu. Biblia na de que puru si ni qué iquiiñeʼ guníʼ íquecabe, ne ndaaniʼ Guidxilayú que guyuu stale guendaridinde.

Nannuʼ xi pur guyuu stálepeʼ guendanagana ca dxi que la? Gúcani purtiʼ Binidxabaʼ biyubi ximodo chiné binni lu guendaquéiquiiñeʼ. Chiguidúʼyanu xi laani.

Génesis 5:21-24, 27; 6:5; Hebreos 11:5; Judas 14, 15.