«Cadi guixéletu de ni rusiideʼ»

«Pa qué guixéletu de ni rusiideʼ, dxandíʼ peʼ discípulo stinneʼ laatu; zunibiaʼtu ni dxandíʼ, ne zuni ni dxandíʼ riʼ laatu libre» (JUAN 8:31, 32).

¿Xi nuu Jesús guiníʼ raríʼ yaʼ? Caniʼbe de ca ni rusiidibe. Laaca bisiénebe tudé zeeda ca ni rusiidibe, guniʼbe: «Bixhozeʼ ni biseendaʼ naa, maʼ gudxi naa xi guinieeʼ ne xi gusiideʼ» (Juan 12:49). Ora biʼniʼ orar Jesús bixhoze ni nuu guibáʼ, Jehová, guniʼbe: «Stiidxaluʼ nga ni dxandíʼ». Nga runi, ora bisiidibe nabé guniʼbe ni gudxi Dios ca xpinni de dxiqué (Juan 17:17; Mateo 4:4, 7, 10). Yanna, ¿ximodo nga qué rixeleʼ ca ni dxandíʼ xpinni Cristu de ca ni bisiidiʼ Jesús yaʼ? Ora rúnicabe ni ná Stiidxaʼ Dios, Biblia, purtiʼ laani nga ni dxandíʼ ne riquiiñecabe ni para gusiidicabe ni runi crécabe ne gacané ni laacabe lu xquendanabánicabe.

Ejemplu stiʼ ca primé xpinni Cristu. Apóstol Pablo nga tobi de ca xpinni Cristu ni jma bicaa carta ni zeeda lu Biblia. Laaca bisisácabe Stiidxaʼ Dios casi Jesús. Laabe guniʼbe: «Guiráʼ ni cá lu Stiidxaʼ Dios la? Dios nga guníʼ xi guicá luni, ne nuu ni para gusiidini laanu» (2 Timoteo 3:16). Laaca gunábacabe ca hermanu ni rusiidiʼ ndaaniʼ ca congregación que cadi guixélecaʼ de ni ná stiidxaʼ Dios ora maʼ cusiidicaʼ (Tito 1:7, 9). Laaca gúdxibe ca xpinni Cristu ca diidxaʼ riʼ: «Lachuu cuidadu cadi guchendaʼ tuuxa laatu né ni zeeda si de xquendabiaaniʼ, purtiʼ zeeda ni de tradición stiʼ binni guidxilayú ne modo riníʼ íquecaʼ ne cadi modo rusiidiʼ Cristu» (Colosenses 2:8).

¿Tu runi zacá ca dxi riʼ yaʼ? Lu Constitución dogmática sobre la divina revelación ni bicaa Vaticano lu iza 1965 ne nuu ni lu Catecismo de la Iglesia Católica, ruzeeteʼ: «Qué rusiidiʼ yuʼduʼ guiráʼ ni dxandíʼ ni zeeda lu Stiidxaʼ Dios, sínuque laaca rusiidicaʼ modo riníʼ ique binni guidxilayú purtiʼ para laacaʼ naquiiñeʼ gaca respetar guiropa ni». Lu revista Maclean’s, ti gunaa de Canadá ni rié yuʼduʼ, guníʼ: «¿Xiñee naquiiñeʼ chinándanu ni ná Stiidxaʼ Dios pa maʼ xadxí gucuá ni? Laanu laaca nápanu idea galán, peru pa chinándanu ni ná Stiidxaʼ Dios la? maʼ qué zasaca diʼ ca ni riníʼ íquenu».

Sicaríʼ guníʼ New Catholic Encyclopedia de ca testigu stiʼ Jehová: «Laacaʼ riquiiñecaʼ Biblia para gusiidicaʼ ni runi crecaʼ ne rinándacaʼ ni zeeda luni». Cadi xadxí, sicaríʼ gudxi ti hombre de Canadá ti gunaa Testigu ni caniʼné laa: «Maʼ nannaʼ tu lii». Biluíʼnabe Biblia stiʼ ne gúdxibe laa: «Libru ni naazeluʼ ca ruluíʼ ni tu lii».