«Nadxiisaatu»

«Cudieeʼ laatu ti mandamientu nacubi: gannaxhiisaatu, cásica huayannaxhieeʼ laatu, zacaca naquiiñeʼ gannaxhiisaatu. Sicaríʼ nga zanna binni nácatu discípulo stinneʼ: pa nadxiisaatu» (JUAN 13:34, 35).

¿Xi nuu Jesús guiníʼ raríʼ yaʼ? Gudxi Jesús ca xpinni naquiiñeʼ gannaxhiisaacaʼ cásica laabe gunnaxhiibe laacaʼ. Peru ¿ximodo gunnaxhii Jesús laacabe yaʼ? Bisihuínnibe ni ra qué ninándabe modo runi ca binni dxiqué purtiʼ laabe gunnaxhiibe guiráʼ clase binni (Juan 4:7-10). Laaca biquiiñebe tiempu ne stipa stibe para gacanebe xcaadxi lugar de niquiiñebe tiempu stibe para laabe (Marcos 6:30-34). Peru ra jma biluiʼbe guendarannaxhii riʼ nga ra bidiibe xquendanabánibe para guilá guiráʼ binni. Laabe guniʼbe: «Naa nga pastor chaʼhuiʼ. Ti pastor chaʼhuiʼ la? rudii xpida pur ca dendxuʼ sti» (Juan 10:11).

Ejemplu stiʼ ca primé xpinni Cristu. Ca xpinni Cristu de primé siglu que gunnaxhiisaacabe casi hermanu (Filemón 1, 2). Laaca galán modo bidxaagalúcabe guiráʼ clase binni ndaaniʼ congregación, purtiʼ para laacabe biaʼca risaca ca judíu ne ca griegu purtiʼ ngueca Señor stiʼ guiracaʼ (Romanos 10:11, 12). Lu iza 33, biluxe si saa stiʼ Pentecostés que, bizulú ca xpinni Cristu de Jerusalén «bitoocaʼ ca layú sticaʼ ne ca cosa ni nápacaʼ ne gudiizicaʼ bueltu que biaʼ caquiiñeʼ cada tobi». ¿Xiñee bíʼnicabe ni yaʼ? Para ganda guiaana ca ni deruʼ guyuunisa ndaaniʼ guidxi Jerusalén ne gucaadiágaca’ guiráʼ ni cusiidiʼ ca apóstol que (Hechos 2:41-45). Ti hombre lá Tertuliano guníʼ xiñee guca ca xpinni Cristu que nacha’hui’, bizeetebe ni guníʼ binni de ca xpinni Cristu que: «Biaa [...] pabiáʼ nadxiisaa ca binni ca [...] dede nuucaʼ dispuestu gáticaʼ pur ca hermanu sticaʼ».

¿Tu runi zacá ca dxi riʼ yaʼ? Ti libru de Historia bizeeteʼ maʼ raca stale iza, stale de ca ni ná xpinni Cristu laa «nabé bininásaaca’ laca laacaʼ». Cadi xadxí, ti estudiu ni guca Estados Unidos guníʼ binni ni ná naca xpinni Cristu rúnicaʼ menu ca ni cadi naca de raza sticaʼ. Nga runi, guirá binni ni nuu lu guidubi Guidxilayú ni naca de ti religión si cadi nuucaʼ tobi si. Pur nga qué randa racanésaacabe ora cadíʼdicabe ra nagana.

Lu iza 2004, lu chupa beeu si guca tapa huracán ndaaniʼ guidxi Florida (EE.UU.). Ti tiempu despué, guyé ti hombre ni gucané ca binni de guidxi que yeguuya pa jneza caquiiñecabe guiráʼ ni biseendaʼ para laacabe. Raqué bidiibe cuenta nin ti grupu cadi nuu tobi si casi ca testigu stiʼ Jehová, ngue runi gúdxibe ca testigu zacanebe laacaʼ. Caadxi iza ante, lu iza 1997, guyé ti grupu de hermanu testigu stiʼ Jehová guidxi República Democrática del Congo yesaanacaʼ medicina, guendaró ne lari para gacanecaʼ ca hermanu de guidxi que ne xcaadxi binni ni caquiiñeʼ ni. Guiráʼ ni biseendaʼ ca hermanu de Europa riʼ gudiʼdiʼ ni jma de ti millón de dólar.