«Zaca predicar ca noticia galán stiʼ Reinu»
«Zaca predicar ca noticia galán stiʼ Reinu»
«Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (MATEO 24:14).
¿Xi nuu Jesús guiníʼ raríʼ yaʼ? Lu Evangeliu stiʼ Lucas na: «Biree Jesús canazá ndaaniʼ guiráʼ guidxi, ne ndaaniʼ ca guidxihuiiniʼ, canayuni predicar ca noticia galán stiʼ Reinu» (Lucas 8:1). Ne guniʼbe: «Laaca naquiiñeʼ guneʼ predicar ca noticia galán stiʼ Reinu stiʼ Dios [...] purtiʼ para nga bendaʼ» (Lucas 4:43.). Primerugá que la? biseendabe ca discípulo stibe guni predicarcaʼ ndaaniʼ guidxi ne xcaadxi guidxi nuu gaxha, peru despué gúdxibe laacaʼ:«Zácatu testigu stinneʼ [...] dede ra jma zitu lu guidxilayú» (Hechos 1:8; Lucas 10:1).
Ejemplu stiʼ ca primé xpinni Cristu. Biʼniʼ ca primé xpinni Cristu ni gudxi Jesús laacaʼ. Lu Hechos 5:42 ná: «Guiráʼ dxi cadi cusaana de gusiidicaʼ ne de guni predicarcaʼ ca noticia galán stiʼ Cristu, Jesús, ndaaniʼ templu ne de yoo pur yoo». De guiráʼ ca xpinni Cristu ni bibani lu primé siglu biʼniʼ dxiiñaʼ riʼ. Ti historiador lá August Neander guníʼ: «Celso, tobi de ca primé hombre ni nabé biʼniʼ criticar ca xpinni Cristu de dxiqué nabé biʼniʼ búrlabe laacaʼ purtiʼ stale de ca binni riʼ qué ñédicaʼ scuela sínuque rúnicaʼ dxiiñaʼ huaxiéʼ risaca casi chitópacabe lana, runi chaahuicabe zapatu». Jean Bernardi, ti hombre ni bicaa libru ni láʼ Les premiers siècles de L’Église (Los primeros siglos de la Iglesia), guníʼ: «Caquiiñeʼ guni predicar ca xpinni Cristu guiráʼ ladu né tutiica binni. Ndaaniʼ guidxi, ca lugar ra ridiʼdiʼ stale binni ne de yoo pur yoo. Ne naquiiñeʼ gúnicaʼ ni ora tiica si». Casi guníʼ hombre riʼ naquiiñeʼ guni predicar ca xpinni Cristu «dede ra jma zitu lu Guidxilayú riʼ».
¿Tu runi zacá ca dxi riʼ yaʼ? Ti cura lá David Watson ná: «Ma’ qué racala’dxi’ binni cheʼ yu’du’ purtiʼ guirutiʼ rusiidiʼ laacabe racá». Lu ti libru láʼ ¿Por qué se van los católicos?, bisiene José Luis Pérez Guadalupe xi dxiiñaʼ nabé risaca runi ca testigu stiʼ Jehová. Sicaríʼ guniʼbe: «Riecaʼ de yoo pur yoo ne rusiidicaʼ binni de Dios ne nga qué runi xcaadxi religión ni casi ca evangélicu, ca adventista ne xcaadxi grupu religioso.
Ti hombre láʼ Jonathan Turley, guníʼ: «Ora ruzeeteʼ binni de ca testigu stiʼ Jehová nagueendaca riníʼ íquecabe de ca binni ni ruxhidxi náʼ ra puertaʼ lídxicabe para guiniʼné laacabe de Dios. Ora runi predicárcabe de yoo pur yoo, rúnicabe ni para gusiidicabe ni runi crécabe peru laaca rúnicabe ni purtiʼ nápacabe fe».
[Cuadru]
¿Maʼ bidiiluʼ cuenta tuu nga ca ni dxandíʼ xpinni Cristu la?
Lu ca artículo ni maʼ gudiʼdiʼ ca maʼ bidúʼyanu ximodo rusiidiʼ Biblia naca ca ni dxandíʼ xpinni Cristu. ¿Ñee maʼ bidiiluʼ cuenta tu laacabe la? Ndaaniʼ Guidxilayú riʼ nuu stale grupu ne religión ni ná xpinni Cristu laacaʼ. Peru cadi guiaandaʼ laanu ni gudxi Jesús ca discípulo stiʼ: «Cadi guiráʼ diʼ ni gabi naa “Señor, Señor” ziuu lu Reinu ni nuu guibáʼ. Ziuu ca ni guni si ni ná Bixhozeʼ ni nuu guibáʼ» (Mateo 7:21). Nga runi para guicaanu ca ndaayaʼ ni chigueedané Reinu stiʼ Dios, caquiiñeʼ gánnanu tuu nga ca ni runi ni ná Dios o ca ni dxandíʼ xpinni Cristu ne chuʼnu ládecaʼ. ¿Ñuuláʼdxiluʼ ñánnaluʼ jma de Reinu stiʼ Dios ne xi chigueedané para binni la? (Lucas 4:43). Runi invitardu lii guiníʼneluʼ ca binni ni bidii lii revista riʼ: ca testigu stiʼ Jehová.