Gudiʼdiʼ si iza 4026 a.J.

«Beendaʼ» que guníʼ qué gapa Jiobá derechu de guni mandar ne qué ganna guni ni. Jiobá guníʼ zeeda ti «descendencia», o «ni za de tuuxa», ne zucaache ique beendaʼ que, o Binidxabaʼ (Génesis 3:1-5, 15; nota). Peru cudiibe lugar guni mandar binni guidxilayú laca laacaʼ, ne gucaa Binidxabaʼ laacaʼ gúnicaʼ ni riuulaʼdxiʼ.

Iza 1943 a.J.

Gudxi Jiobá Abrahán tobi de ca xiiñiʼ nga zeeda gaca «descendencia» que (Génesis 22:18).

Gudiʼdiʼ si iza 1070 a.J.

Gudxi Jiobá rey David ne despué Salomón, de binnilídxicaʼ zeeda «descendencia» que (2 Samuel 7:12, 16; 1 Reyes 9:3-5; Isaías 9:6, 7).

Iza 29 d.J.

Guníʼ Jiobá Jesús nga «descendencia» que ne laa nga chigaca rey stiʼ reinu stiʼ David (Gálatas 3:16; Lucas 1:31-33; 3:21, 22).

 Iza 33 d.J.

Bicaa Binidxabaʼ, «beendaʼ» que, guuticabe Jesús, ne zaqué nga bininabe «descendencia» que pur ti tiempu. Gundisaʼ Jiobá Jesús de lade gueʼtuʼ, bidxiguétabe laa guibáʼ ne bisisácabe ni biʼniʼ pur bidii guendanabani sin donda stiʼ. Zacá bisihuinni Jiobá zanda guxhiá donda stiʼ guiráʼ cani za de Adán ne guibánicaʼ sin qué chuʼ dxi gáticaʼ (Génesis 3:15; Hechos 2:32-36; 1 Corintios 15:21, 22).

Gaxha de iza 1914 d.J.

Bisaba Jesús «beenda» que lu Guidxilayú ne bicaabe laa guiaana luni ti tiempu si (Apocalipsis 12:7-9, 12).

Ni chigaca

Zuseguyoo Jesús Binidxabaʼ ti mil iza ne despué zunitilube laa. Zacá nga casi ñaca nucaachebe ique. Oraqueruʼ nga zaca ni maca gudixhe ique Jiobá guniné Guidxilayú riʼ ne binni. Dxicaruʼ nga ziá lá Dios ne laaca zahuinni modo runi mandarbe nga ni jma jneza (Apocalipsis 20:1-3, 10; 21:3, 4).