Gucané Biblia laacabe para bichaacabe

¿XI GUCANÉ ti hombre ni riguite para guni ganar stale bueltu ne ribaʼnaʼ gusaana ca viciu riʼ ne guchaa modo nabani? Gudiʼnu lugar güínebe ni laanu.

«Nabé guyuuladxeʼ carrera de caballu» (RICHARD STEWART)

IZA GÚLEBE: 1965

PADÉ LAABE: JAMAICA

NI NAQUIIÑEʼ GÁNNALUʼ: GUDXÍTEBE PARA GUNI GANARBE STALE BUELTU NE GULÁʼNABE

MODO BIBANEʼ DXIQUÉ: Guleʼ ndaaniʼ guidxi Kingston, capital stiʼ Jamaica ne biniiseʼ ndaaniʼ ti familia nabé pobre, gastiʼ dxiiñaʼ ne nuu stale gubaanaʼ. Nabé ridxibi binni ca binni malu nuu raqué. Ne guiráʼ dxi runadiágaluʼ balazu.

Nabé biʼniʼ jñaaʼ dxiiñaʼ para bisiniisibe naa, ti bicheʼ jma nahuiiniʼ ne ti bizanaʼ. Bíʼnibe stipa chuudu scuela. Peru naa qué riuuladxeʼ chaaʼ scuela, ni riuuladxeʼ nga carrera de caballu. Nga runi, stale biaje guuyaʼ ca lugar ra ruxooñeʼ ca caballu ca ne dede gudxiʼbaʼ caadxi de laacame.

Qué nindaa gupaʼ viciu quiteʼ apuesta ne gupaʼ stale gunaa, guduʼbaʼ marihuanu ne cadi ngasi, laaca gucaʼ ti gubaanaʼ, nga runi gupaʼ stale guiibaʼ. ¡Ni galán nga qué ñuuteʼ nin ti binni ora guxhaʼ laacaʼ ni nápacaʼ!

Peru gunaaze puliciá naa ne guluucabe naa cárcel. Peru ora bindaacabe naa bineʼ cosa jma feu qué ni runeʼ que, ruluíʼ naca ti binni nachaʼhuiʼ, peru ni dxandíʼ la? nabé tercu naa, ricayaʼ tema gaca ni rabeʼ, ne runeʼ cosa malu. Ne laca ruyubeʼ puru si para naa.

XIMODO GUCANÉ BIBLIA NAA PARA BICHAA: Tiempu que la? bizulú cayuni estudiar jñaaʼ Biblia ne guca testigu stiʼ Jehová. Cumu biiyaʼ maʼ qué runi jñaaʼ ca cosa ni bi’ni’ dxiqué la? guníʼ iqueʼ xi cayacané laabe guchaabe, nga runi bizuluáʼ gunieniaʼ ca testigu stiʼ Jehová.

Nagueendaca bidieeʼ cuenta cadi nácacabe casi xcaadxi religión purtiʼ laacabe nabé riquiiñecabe Biblia ne laasicabe nga riécabe de yoo pur yoo para gusiidicabe binni de Biblia casi bi’ni’ ca primé xpinni Cristu (Mateo 28:19; Hechos 20:20). Peru ora biiyaʼ nabé nadxiisaacabe la? bidieeʼ cuenta laacabe nga religión ni dxandíʼ (Juan 13:35).

Laga cayuneʼ estudiar Biblia, bidieeʼ cuenta caquiiñeʼ guchaaʼ modo naa. Purtiʼ qué riuulaʼdxiʼ Jehová guni cometer binni pecadu sexual, ne pa racalaʼdxeʼ guneʼ ni nabe la? caquiiñeʼ gusaanaʼ guiráʼ ca cosa ni runi biidiʼ xcuerpu binni (2 Corintios 7:1; Hebreos 13:4). Dxi biziideʼ napa Jehová sentimientu, bidieeʼ cuenta zanda gunenaʼyaʼ o gusiecheʼ laabe pur ca cosa ni guneʼ (Proverbios 27:11). Nga runi, gudixheʼ iqueʼ gusaanaʼ de cubaʼ marihuanu, maʼ qué niquiiñeʼ guiibaʼ ne bineʼ stipa guchaaʼ modo naa. Peru ni jma guca nagana para naa nga gusaanaʼ de quiteʼ apuesta ne gapaʼ stale gunaa.

Primerugá que, qué racalaʼdxeʼ ganna ca xhamiguaʼ cayuneʼ estudiar Biblia né ca Testigu. Peru gucané Mateo 10:33 naa cadi guiníʼ iqueʼ zaqué, racá ná: «Guiráʼ ni guiníʼ qué runibiáʼ naa nezalú binni, laaca zanieeʼ qué runebiaʼyaʼ laa nezalú Bixhozeʼ ni nuu guibáʼ». Nga runi nagueendaca gudxeʼ ca xhamiguaʼ cayuneʼ estudiar Biblia né ca Testigu. Qué guiráʼ guidxagayaacabe racalaʼdxeʼ gacaʼ ti xpinni Cristu. Neca zaqué la? bisieneʼ laacabe racalaʼdxeʼ guchaaʼ modo naa.

XI MA’ GULEENDUÁʼ: Nabé biecheʼ jñaaʼ ora biiyaʼ maʼ cayuneʼ ni ná Biblia. Yanna maʼ qué riuube xizaa pur naa casi dxiqué. Ne nabé riuuláʼdxidu guinidu de guendarannaxhii ni nápadu Jehová. Nuu tiru rietenalaʼdxeʼ modo bibaneʼ dxiqué, ne nabé ridxagayaaʼ modo gucané Dios naa guchaaʼ. Ma’ qué runeʼ cosa ni qué riuulaʼdxiʼ Dios né maʼ qué ruyubeʼ gapa cosa risaca casi dxiqué.

Nannaʼ dxiicheʼ pa ñaca qué nucaadiaʼgaʼ mensaje stiʼ Biblia, yanna riʼ ñuaaʼ cárcel o dede maʼ guteʼ. Nga runi, rudieeʼ xquixe peʼ Jehová pur bisiidiʼ naa ni ná Biblia ne yanna riʼ maʼ nabaneniáʼ familia stinneʼ nayecheʼ. Nabé racané xheelaʼ naa ne nabé runi respetar xiiñeʼ naa, guiradu rúnidu ni ná Jehová de guidubi ladxidoʼdo. De qué ridxelaʼ ximodo gudieeʼ xquixe peʼ pur bisiidicabe naa ni ná Biblia. Nga runi, runeʼ stipa gusiideʼ binni de Dios ra tiica si nuaaʼ. Rudieeʼ xquixe peʼ Jehová purtiʼ bidii lugar chuaaʼ ndaaniʼ xquidxi ne purtiʼ bichíñabe naa ra nuube.

[Ni caníʼ/Epígrafe]

«Dxi biziideʼ napa Jehová sentimientu bidieeʼ cuenta zanda gunenaʼyaʼ o gusiecheʼ laabe pur ca cosa ni guneʼ»

[Imagen]

Naa ne xheelaʼ ne xiiñidu

[Imagen]

Cumu biiyaʼ maʼ qué runi jñaaʼ ca cosa ni bi’ni’ dxiqué la? guníʼ iqueʼ xi cayacané laabe guchaabe