Runi respetar ne rusisaca Dios ca gunaa

DXI guyuu Jesús lu Guidxilayú, guizáʼ galán modo bisihuínnibe ca cualidad ni napa Bixhózebe ni nuu guibáʼ. Laabe guniʼbe: «Qué runeʼ gastiʼ de naa siaʼ, sínuque rinieeʼ ca cosa riʼ casi bisiidiʼ Bixhozeʼ ni naa». Ne guníʼrube: «Siempre runeʼ ca cosa ni riuuláʼdxibe» (Juan 8:28, 29; Colosenses 1:15). Nga runi, pa racaláʼdxinu gánnanu xi riníʼ ique Dios de ca gunaa ne ximodo racaláʼdxibe guni tratarnu laacabe la? caquiiñeʼ guiduʼyaʼ chaahuinu ejemplu stiʼ Jesús.

Ca binni ni rundaa de ca Evangeliu ca nacaʼ maʼ gadxé modo biʼniʼ tratar Jesús ca gunaa ca. ¿Ximodo yaʼ? ¿Ñee dede yanna racané ca ni bisiidiʼ Jesús ca gunna ca la?

Ximodo biʼniʼ tratar Jesús ca gunaa

◼ Qué niníʼ ique Jesús mal de ca gunaa. Ca xaíque stiʼ ca religión stiʼ ca judíu que, cadi jneza modo guni íquecaʼ de ca gunna purtiʼ nacaʼ zándaca gúcacabe laacaʼ gucheecaʼ. Pur ngue gúdxicabe ca gunaa que naquiiñeʼ guchiica’ íquecaʼ ora guireecaʼ ne cadi guiníʼnecaʼ hombre. Peru Jesús qué niníʼ cadi guidxaaga binni ca gunaa, sínuque bisiidibe naquiiñeʼ gucueeza ca hombre ca laca laacaʼ ne guni tratarcaʼ ca gunaa né respetu (Mateo 5:28).

Laaca guníʼ Jesús: «Guiráʼ hombre gaca divorciar de xheelaʼ ne guichaganáʼ sti gunaa la? maʼ guendarapa jnadxii nga» (Marcos 10:11, 12). Né ca diidxaʼ riʼ qué niníʼ Jesús zanda gaca divorciar ti hombre de xheelaʼ pur intiica si cosa casi guníʼ ique ca maestru de ley de dxiqué (Mateo 19:3, 9). Cadi jneza modo guníʼ ique ca judíu que de guendarapa jnadxii. Para laacabe cadi guendarapa jnadxii nga chuʼné ti hombre ti gunaa ni cadi xheelaʼ. Ca maestru de ley que guníʼ íquecaʼ ca gunaa ca nga ruchee ne cadi ca hombre. Sicaríʼ guníʼ ti comentariu ni caníʼ de Biblia: «Ora gudixhe Jesús xi naquiiñeʼ guni ti hombre ne ti gunaa ni maʼ bichaganáʼ, bisihuínnibe laaca risaca ca gunaa ca».

Modo racané ni ca gunaa de tiempu riʼ. Ndaaniʼ ca congregación stiʼ ca testigu stiʼ Jehová, riniʼné ca gunaa ca hombre purtiʼ nánnacaʼ qué zaníʼ íquecabe mal de laacaʼ, sínuque zuni tratárcabe laaca’ né respetu. Ca hombre xpinni Cristu rúnicaʼ stipa guni tratarcaʼ ca gunaa ni jma huaniisi casi jñaacaʼ, ne ca gunaa ni jma nahuiiniʼ casi bizáʼnacaʼ, peru sin guiníʼ íquecaʼ sti cosa de laacabe (1 Timoteo 5:2).

◼ Gulee Jesús tiempu para gusiidiʼ ca gunaa. Ca maestru de ley de dxiqué qué ninacaʼ nusiidicaʼ ca gunaa. Peru Jesús gulee tiempu para gusiidiʼ ca gunaa dede gunábabe laacaʼ guiniʼcaʼ ni riníʼ íquecaʼ ne laaca qué niníʼ íquebe nuu gunaa para si guni dxiiñaʼ ndaaniʼ yoo. Bisihuínnibe ni dxi qué nucueezabe María de niziidiʼ (Lucas 10:38-42). Ne pur modo bicabi Marta, benda María Jesús, dxi guti Lázaro, bisihuinni ni laaca biziidibe ni bisiidiʼ Jesús (Juan 11:21-27).

Bizaalaʼdxiʼ Jesús gusiidiʼ ca gunaa. Tiempu que stale de ca gunna judía, nabé bisisácacaʼ gápacaʼ ti xiiñicaʼ hombre purtiʼ zanda gaca tuuxa risaca, casi ti profeta. Ngue runi ora gudxi ti gunaa Jesús «dichosa gunaa ni gucaxiiñiʼ lii», biquiiñebe oportunidad que para gusiidibe laa ni jma risaca nga guzuuba binni stiidxa Dios (Lucas 11:27, 28). Zaqué bisihuínnibe napa gunaa stale cosa risaca ni guni jma que ni rinabaʼ tradición stiʼ ca judíu que laacabe gúnicabe (Juan 8:32).

Modo racané ni ca gunaa de tiempu riʼ: Ndaaniʼ ca congregación stiʼ ca testigu stiʼ Jehová randa runi comentar ca gunaa lu ca reunión ca. Ca hermanu o ni rusiidiʼ ndaaniʼ ca congregación ca runi respetárcabe ca hermana ni maʼ huaniisi pur nácacaʼ ti ejemplu galán para xcaadxi purtiʼ rusiidicaʼ ni jneza (Tito 2:3). Laaca racané ca hermana riʼ gaca predicar ca noticia galán stiʼ reinu stiʼ Dios (Salmo 68:11; biiyaʼ cuadru ni lá « ¿Ñee bi’ni’ prohibir apóstol Pablo guiníʼ ca gunaa ca la?», ni zeeda lu yaza 9).

◼ Bisisaca Jesús ca gunaa. Tiempu gucuá Biblia nabé bisaca para binni gapa ti xiiñiʼ hombre. Ti libru ni láʼ Talmud ná: «Dichoso ni napa ti xiiñiʼ hombre, peru pobre ni napa gunaa». Guníʼ íquecabe ti carga nga gapa tuuxa ti xiiñiʼ gunaa, purtiʼ napa xidé guyúbicabe xheelabe ne gudiicabe xiixa ora guichaganabe, neca nánnacabe qué zuuyaʼ laacabe ora maʼ nagólacabe.

Peru maʼ gadxé guca Jesús, laa bisisaca guendanabani stiʼ ti gunaa cásica stiʼ ti hombre. Bisihuínnibe ni ra bisibánibe xiiñiʼ ti viuda de guidxi Naín, ne xiiñidxaapaʼ Jairo (Marcos 5:35, 41, 42; Lucas 7:11-15). Ti biaje bisianda Jesús «ti gunaa ni maʼ ziné 18 iza de huará pur ti demonio». Dede gúdxibe laa «xiiñiʼ Abrahán», ti diidxaʼ ni huaxiéʼ biquiiñeʼ ca judíu lu ca libru sticaʼ (Lucas 13:10-16). Pur modo bi’ni’ tratar Jesús gunaa riʼ bisihuínnibe runi respetarbe ca gunaa ne rusisácabe fe ni nápacaʼ (Lucas 19:9; Gálatas 3:7).

Modo racané ni ca gunaa de tiempu riʼ: Ti dichu ni riquiiñecabe Asia ná ora rusiniisi binni ti xiiñiʼ gunaa, casi ñaca cusiniisi xiixa ni cadi stiʼ. Peru ti xpinni Cristu ni nadxii ca xiiñiʼ qué riníʼ ique zacá. Sínuque rápabe guiráʼ ca xiiñibe cásica hombre zaqueca gunaa, rusiidibe laacaʼ ne ruuyabe chuʼcaʼ nazaaca.

◼ Gupa Jesús confianza ca gunaa. Lu ca tribunal stiʼ ca judíu que, qué risaca testimonio stiʼ ti gunaa. Sicaríʼ guníʼ Josefo, ti historiador ni bibani lu primé siglu: «Qué rulábicabe ni riníʼ ti gunaa purtiʼ huaxiéʼ risaca ne runi cosa ni cadi jneza».

¡Gadxé peʼ guca Jesús! Laa gulí caadxi gunaa para guiniʼcaʼ maʼ biásabe de lade gue’tu’ (Mateo 28:1, 8-10). Neca biʼyaʼ ca gunaa riʼ modo guti Jesús ne ra bigaachiʼ la? guca nagana para ca apóstol que guni crecaʼ ni caníʼcabe que (Mateo 27:55, 56, 61; Lucas 24:10, 11). Nga runi, ra gulí Jesús ca gunaa riʼ para guini’ca’ maʼ biásabe de lade gue’tu’, bisihuínnibe laaca risaca gaca ti gunaa testigu stibe cásica tutiica discípulo (Hechos 1:8, 14).

Modo racané ni ca gunaa de tiempu riʼ: Ca hermanu ni napa privilegiu ndaaniʼ congregación stiʼ ca testigu stiʼ Jehová rusihuínnicaʼ rusisácacaʼ ca gunaa ora rucaadiágacaʼ ni riníʼcabe, ne ca xpinni Cristu ni maʼ bichaganáʼ rusihuínnicaʼ rusisaca xheelacaʼ ora rucaadiaga chaahuicaʼ laacabe (1 Pedro 3:7; Génesis 21:12).

Racané ca principiu ni zeeda lu Biblia chuʼ ca gunaa nayecheʼ

Ca xpinni Cristu de tiempu riʼ laaca runi respetarcaʼ ca gunaa casi biʼniʼ Jehová ni dxi bizáʼ laacabe (Génesis 1:27, 28). Ca xpinni Cristu ni maʼ bichaganáʼ qué rúnicaʼ ni nacaʼ para si guninacaʼ xheelacaʼ. Sínuque rinándacabe ca principiu zeeda de lu Biblia para chuʼ xheelacabe nayecheʼ (Efesios 5:28, 29).

Dxi bizulú Yelena biʼniʼ estudiar Biblia, nabé bininá xheelabe laabe. Biniisi xheelabe ndaaniʼ ti familia ni nabé ridinde, ra nápacabe costumbre cuánacabe ca gunaa para guichaganácabe laacaʼ ne laaca nabé runinácabe ca gunaa lugar que. Laabe guniʼbe: «Bidii Biblia stipa naa purtiʼ biziideʼ nuu ti Dios ni dxandíʼ nadxii, rusisacaʼ ne rizaalaʼdxiʼ naa. Bidieeʼ cuenta pa guni estudiar xheelaʼ Biblia, zanda guchaa modo laa». Ne zaqué guca ni, qué nindaa beeda gaca xheelabe ti testigu stiʼ Jehová. Yelena guníʼ: «Bisiidiʼ xheelaʼ gucueeza laca laa ne guirópadu bizíʼdidu guni perdonarsaadu». Laaca guniʼbe: «Bidieeʼ cuenta dxandíʼ racané ca conseju zeeda lu Biblia naa guneʼ sentir nuu tu nadxii ne rapa naa lu xquendaxheelaʼ» (Colosenses 3:13, 18, 19).

Cadi Yelena si bizaaca zacá. Tiempu riʼ stale gunaa xpinni Cristu nabaniné xheelaʼ nayecheʼ, purtiʼ rúnicaʼ stipa chinándacaʼ ca conseju zeeda lu Biblia lu xquendaxheelacaʼ. Laaca runi sentírcabe nuu tu nadxii ne runi respetar laacabe ndaaniʼ congregación (Juan 13:34, 35).

Guiráʼ ca xpinni Cristu, cásica hombre ne gunaa, nánnacaʼ nácacaʼ binni ruchee ne nuucaʼ lade creación ni biliibi para cadi iquiiñeʼ. Ne laaca nánnacabe pa guidxíñacabe bixhózecabe Jehová ni nadxii laacabe, maʼ qué zácacabe esclavu stiʼ pecadu ne zácacabe libre «cásica ca xiiñiʼ Dios». ¡Guizáʼ galán esperanza ni napa ca hombre ne gunaa ni nuu gaxha de Dios! (Romanos 8:20, 21).

[Cuadru]

 ¿Ñee bi’ni’ prohibir apóstol Pablo guiníʼ ca gunaa ca la?

Guníʼ apóstol Pablo cadi naquiiñeʼ guiníʼ ca gunaa ndaaniʼ congregación (1 Corintios 14:34). ¿Xi gucaláʼdxibe niniʼbe yaʼ? ¿Ñee guniʼbe qué zanda gusiidiʼ ca gunna ca la? Cadi nga diʼ nga ni gucaláʼdxibe niniʼbe, purtiʼ stale biaje bisisácabe dxiiñaʼ ni bi’ni’ ca gunna ca ra bisiidicaʼ xcaadxi binni (2 Timoteo 1:5; Tito 2:3-5). Lu tobi de ca carta ni bicaa Pablo ra nuu ca hermanu de Corinto, guníʼ cadi ca gunaa si nga naquiiñeʼ igani ora maʼ caníʼ sti xpinni Cristu, sínuque né ca ni riníʼ sti idioma ne ca ni riníʼ ni biluíʼ Dios laa (1 Corintios 14:26-30, 33). * Zándaca pur cayecheʼ ti gunna xpinni Cristu ne guiráʼ ni caziidiʼ gacalaʼdxiʼ gucueeza ni cusiidiʼ ca para guinabadiidxaʼ xiixa casi bíʼnicabe dxiqué, peru para ganda chuʼ orden la? apóstol Pablo guníʼ jma galán guinabadiidxacabe xheelacabe ra lídxicabe (1 Corintios 14:35).

[Nota]

[Imagen]

[Imagen]

Gunabaʼ Jesús María Magdalena chitidxi ca apóstol maʼ biásabe de lade gueʼtuʼ

[Imagen]

Ca binni ni rinanda ca principiu zeeda lu Biblia runi respetarcaʼ ne runi tratarcaʼ ca gunaa ca galán